Үөһээ Бүлүүгэ баһаарга эр киһи эмсэҕэлээбит

Үөһээ Бүлүү улууһун Үөдүгэй сэлиэнньэтигэр чааһынай биир мэндиэмэннээх олорор дьиэ умайбыт.

Быһылааҥҥа 54 саастаах эр киһи эмсэҕэлээтэ диэн Саха сиринээҕи Баһаары утары судаарыстыбаннай сулууспата иһитиннэрдэ.

Баһаарынай чааска тыллабыр атырдьах ыйын 4 күнүгэр түүн 23:39 чааска киирбит. Уокка 30 кв. м иэннээх дьиэ бүтүннүү былдьаммыт. Уоту умуруорууга алта киһи уонна икки тиэхиньикэ тардыллыбыт. Баһаар төрүөтэ, буруйдаах уонна хоромньу быһаарыллар.