Үөһээ Бүлүүгэ байыастар наҕараадаларын туттардылар

Бүгүн, алтынньы 13 күнүгэр, Үөһээ Бүлүүгэ  анал байыаннай дьайыы хонуутугар дьоруойдуу  олохторун толук уурбут байыастар наҕараадаларын туттарыы буолла. Бу туһунан улуус баһылыга Валерий Николаев иһитиннэрдэ.

— Арассыыйа Аҕа баһылыга В.В. Путин 2025 сыл муус устар 17 күнүнээҕи 188594 №-дээх ыйааҕынан анал байыаннай дьайыыга Ийэ дойду харысхалын иһин сырдык тыынын толук уурбут Иванов Дмитрий Михайлович аатыгар Маршал Жуков аатынан уордьаны ийэтигэр Марфа Ивановна Ивановаҕа туттардым.  В.В.Путин балаҕан ыйын 2025 сыл 6 күнүнээҕи 206555 №-дээх ыйааҕынан анал байыаннай дьайыыга укронацистар утары хорсуннук охсуспут, сэрии хонуутугар олоҕун кэрэйбэккэ сиэртибэлээбит биир дойдулаахпыт Степанов Виктор Иванович аатыгар кэлбит «Эр санааланыы» уордьаны ийэтигэр Александра Никоновна Степановаҕа туттардым. Байыаннай дьайыы дьоруойдарын, дойдубутун неонацистартан харыстаан уоттаах киирсиилэргэ бэйэлэрин кэрэйбэккэ саа саадах охсуспут буойуттарбытын, сырдык тыыннарын толук уурбут биир дойдулаахтарбытын хаһан да умнуо суохпут, үйэ саас тухары сырдык ааттарын ааттыы, үйэтитэ туруохпут, — диэтэ Валерий Николаев.