Үөһээ Бүлүүгэ бөрөһүттэр мунньахтаатылар

Үөһээ Бүлүү улууһугар бөрөһүттэр сэминээр-мунньахтара буолла. Улуус нэһилиэктэриттэн 25 булчут кэлэн, мунньахтаатылар, уопуттарын атастастылар.

Бөрөһүттэр бу сиэмэх кыыллар булт уонна тыа хаһаайыстыбатыгар улахан хоромньуну таһааралларын таһынан, нэһилиэнньэлээх пууннар олохтоохторугар эмиэ кутталы үөскэтэллэр диэн этиннилэр.

Бөрөһүттэр сиэмэх кыыллар  майгыларын, сылдьар, кэрийэр, аһыыр сирдэрин үчүгэйдик билэр буолан, хайдах бултуур ньымалары эмиэ билэллэр. Бөрөнү бултуур буоллахха, айылҕаҕа олус элбээбэттэр, онон хоромньу да аҕыйыыр. Бөрөлөр сүрүннээн сыһыыга көҥүл сылдьар Дьөһөгөй оҕолоругар кутталлаахтар.

Мунньахха бултаммыт бөрө иһин дотацияны үрдэтэр уонна эһэ ахсаана эбиллэрин бохсоррго миэрэ ылыллыахтааҕын туһунан кэпсэттилэр.

2025 сылга адьырҕалар ахсааннарын бохсорго 2,5 мөлүйүөн солкуобай көрүлүннэ диэн экология, айылҕаны туһаныы, ойуур хаһаайыстыбатын министиэристибэтэ иһитиннэрэр. Улахан бөрө тириитин иһин 30 тыһыынча солкуобайдаах, бөрө оҕотун тириитигэр 10 тыһыынча солкуобайдаах субсидия төлөнөр.

Күн иккис аҥаарыгар уопуттаах бөрөһүттэр эдэр булчуттарга хапкаанынан уонна туһаҕынан бултуурга уопуттарын үллэстэн, дьарык ыыттылар. Бу курдук алтыһыы, уопут атастаһыыта, сэминээрдэри ыытыы бастайааннай буоллун диэн мунньах кыттааччылара санааларын эттилэр.