Үөһээ Бүлүүгэ бу сыл бүтүөр диэри өссө биир элбэх кыбартыыралаах дьиэ үлэҕэ киллэриллиэ

Бу күннэргэ Үөһээ Бүлүү сэлиэнньэтигэр «Хаарбах дьиэттэн көһөрүү»  бырагырааманан  элбэх кыбартыыралаах икки дьиэ үлэҕэ киллэриллэн, олохтоохтор күлүүстэрин туппуттара.

Улуус киинигэр өссө биир элбэх кыбартыыралаах дьиэ Интернациональнай уулуссаҕа тутулла турар.

— «Хаарбах дьиэттэн көһөрүү» бырагыраама чэрчитинэн тутуллар  саҥа дьиэ күлүүстэрин сотору кэминэн хаарбах дьиэттэн көһөөччүлэр  тутуохтара. Бу дьиэҕэ эбии 2 кыбартыыраны улуус суотугар исписэлиистэргэ анаан ылыахтаахпыт.

Билиҥҥи туругунан тас фасадын уонна ис үлэтин оҥорууга үлэ бара турар.

Быйыл улуус суотугар уопсайа 4 кыбартыыраны ылабыт. Манна  учууталлар, быраастар, тустаах исписэлиистэр олоруохтара.

Саха Өрөспүүбүлүкэтин тутуутун министиэристибэтэ ыытар куонкуруһугар эһиил  өссө ситиһиилээхтик кыттан маннык служебнай кыбартыыралары  улуус үрдүнэн элбэтэр былааннаахпыт, — диэн улуус баһылыга Валерий Николаев телеграмҥа суруйда.