Үөһээ Бүлүүгэ булчут өлүгүн хайдах булбуттарый?

Үөһээ Бүлүү улууһугар булчут сүттэ диэн иһитиннэрии киирбитин кэннэ, сэтинньи 4 күнүгэр көрдүүр үлэ саҕаламмыта. 

Бастаан олохтоох дьон бэйэлэрэ көрдүү сатаабыттара. Онтон олохтоох дьаһалта биллэрбитин кэнниттэн, сэтинньи 5 күнүттэн Саха сирин Быыһыыр сулууспатын Үөһээ Бүлүүтээҕи көрдүүр-быыһыыр этэрээтин быыһааччылара холбоспуттара.

1951 с.т. эр киһи Туобуйа сэлиэнньэтиттэн бэйэтин бултуур сиригэр алтынньы 25 күнүгэр барбыта. Кини икки ыттаах уонна аттаах этэ. Болдьоспут кэмигэр эргиллибэтэҕин иһин, аймахтара ыксаан, дьоҥҥо, дьаһалтаҕа биллэрбиттэрэ.

Сэлиэнньэттэн 20 килэмиэтирдээх сиргэ баар үүтээнигэр тиийэн, биир баайыллан турар ытын булбуттара. Ата уонна биир ыта суох этилэр. Хаар, тибии түһэн, суолларын симэлиппит этэ.

«Үүтээҥҥэ сэтинньи 6 күнүн күнүһүгэр эрэ тиийбиппит. Онно киһи-сүөһү сылдьыбат сирэ, онон суолбутун солонон тиийбиппит. Көрдүүр былаан оҥостон баран, хараҥарыар диэри атынан сылдьан, чугастааҕы ойууру көрбүппүт. Биир ыт суолун булбуппут, ойуур иһигэр киирэн бара турбута. Бу ыт хаһаайыныттан үүтээҥҥэ, онтон төттөрү хаһаайыныгар барар эбит диэн өйдөөбүппүт. Хараҥаран хаалан, кыайан суоллаан барбатахпыт», — диэн көрдүүр бөлөх ыстаарсайа Денис Никифоров кэпсиир.

Сэтинньи 7 күнүгэр сырдаатын кытта, икки бөлөххө арахсан, көрдүү барбыттара. Аттаах уонна сатыы бөлөхтөр ыт суолун суоллаан барбыттара. Аттаах дьон урут тиийэн, сүппүт киһи өлүгүн булбуттара. Киһи умса түһэн сытара, арааһа, атыттан түһэн баран, атын баайбыт. Ат мөхсөн, быатын сүөрэн, баран хаалбыт. Атын кэлин булбуттара. Киһи аттыгар киис өлүгэ баара, ону кини көрдүннэр диэн, маска ыйаабыт эбит. Арааһа, туруга мөлтөөбүтүн биллэҕэ…

Быыһааччылар полицияны ыҥырбыттар, киһи туохтан өлбүтүн силиэстийэ чопчу быһаарыаҕа диэн Быыһыыр сулууспа иһитиннэрэр.