Үөһээ Бүлүүгэ дьиэ баһаарыгар икки киһи тыына быһынна

Бэҕэһээ, сэтинньи 7 күнүгэр, Үөһээ Бүлүү улууһун Боотулуу нэһилиэгэр чааһынай дьиэ умайда. Баһаар буолбут дьиэтиттэн икки киһи өлүгэ көһүннэ диэн СӨ ЫБММ иһитиннэрдэ.

«Баһаар буолбут сириттэн 61 саастаах дьахтар уонна 64 саастаах эр киһи өлүктэрэ көһүннэ», — диэн иһитиннэриигэ суруллар.

Баһаар Центральнай уулуссаҕа баар дьиэҕэ буолбут. Уот 19 кв.м. иэнинэн тарҕаммыт. Умуруорууга аҕыс киһи уонна биир массыына үлэлээтэ.

Өлбүттээхтэр аймахтарын кытта РСЧС уйулҕаһыттара үлэлииллэр. Баһаар төрүөттэрин быһаараллар.