Үөһээ Бүлүүгэ Дьокуускайдааҕы педагогическай кэллиэс салаата аһыллыаҕа

Тохсунньу 22 күнүгэр Дьокуускай куоракка Үөһээ Бүлүүгэ ураты суолталаах бэлиэ түгэн үүннэ — Үөһээ Бүлүү улууһун дьаһалтатын, С.Ф. Гоголев аатынан Дьокуускайдааҕы педагогическай кэллиэс уонна М.Т. Егоров аатынан Үөһээ Бүлүүтээҕи 2 №-дээх орто оскуолатын икки ардыларыгар бииргэ үлэлэһии туһунан үс өрүттээх сөбүлэҥҥэ илии баттанна.

«Бу көннөрү официальнай докумуон эрэ буолбатах. Улуус оскуолаларыгар педагогическай каадыр тиийбэтин быһаарабыт. Хаачыстыбалаах үөрэх — Үөһээ Бүлүү улууһун кэскиллээх олоҕо. 2026 сыл биһиэхэ ураты сыл — биһиги улууспутугар үөрэхтээһин систиэмэтэ тэриллибитэ 150 сылын бэлиэтиэхпит. Үбүлүөйдээх сылы саҕалыырга педагогическай кыаҕы бөҕөргөтүүгэ туһуламмыт дьиҥнээх хардыылары бастыҥ саҕалааһын быһыытынан ааҕабын. Сөбүлэҥ быһыытынан, Үөһээ Бүлүүтээҕи 2 №-дээх оскуолатын баазатыгар Дьокуускайдааҕы педкэллиэс салаата аһыллыаҕа. Онон олохтоох оҕолор дьиэлэриттэн ырааппакка эрэ педагогическай идэни баһылыахтара, үөрэхтэрин кэнниттэн биһиги оскуолаларбытыгар үлэлииллэрэ мэктиэлэннэ. Улуус дьаһалтата бэйэтин өттүттэн үөрэх бырасыаһын тэрийэргэ бары наадалаах усулуобуйаны хааччыйыаҕа. Биһиги ону таһынан учууталларбытыгар методическай өйөбүлү оҥорорго, үөрэнээччилэргэ идэни таларга көмөлөһөр үлэни тэрийэргэ уонна выпускниктар үлэҕэ киирэллэригэр көмөлөһөргө кэпсэттибит. Бииргэ үлэлэһэргэ бэлэмнэрин иһин кэллиэс дириэктэригэр Изольда Николаеваҕа уонна оскуола дириэктэригэр Васмар Руфовка махталбын тиэрдэбин. Күүспүтүн түмтэхпитинэ эрэ, биһиги каадыр боппуруоһун систиэмэлээхтик уонна өр кэмҥэ быһаарар кыахтаныахпыт. Ити үбүлүөйдээх сылга анаммыт улахан үлэбит саҕаланыыта. Бары бииргэ улууспутугар үөрэх таһымын саҥа үрдүккэ таһаарыахпыт диэн бигэ эрэллээхпин, — диэн улуус баһылыга Валерий Николаев телеграм-ханаалыгар суруйар.