Үөһээ Бүлүүгэ өрөспүүбүлүкэтээҕи психологическай киин филиала арылынна

Өрөспүүбүлүкэтээҕи психологическай киин Саха сиригэр 20-чэ филиалы үлэлэтэр.

Бу күннэргэ Үөһээ Бүлүү улууһугар өрөспүүбүлүкэтээҕи психологическай киин филиала арылынна. Тэрилтэни арыйар үөрүүлээх  түгэҥҥэ өрөспүүбүлүкэтээҕи психологическай киин дириэктэрэ Владимир Скрябин уонна өрөспүүбүлүкэтээҕи психологическай киин дириэктэрин солбуйааччы Октябрина Туприна кыттыыны ыллылар. Бу туһунан улуус баһылыга Валерий Николаев бэйэтин телеграм-ханаалыгар билиһиннэрдэ:

“Билиҥҥи кэмҥэ, анал байыаннай дьайыы кыттыылаахтарын, кинилэр дьиэ кэргэттэрин, маны сэргэ, олохторугар ыарахаттары көрсүбүт дьону чөл турукка киллэриигэ уйулҕа быраастара үлэлэһэллэрэ ирдэнэрин өйдөөн, 2024 сылга СӨ Ыччат уонна дьиэ кэргэн бэлиитикэтин министиэристибэтин, өрөспүүбүлүкэтээҕи психологическай киини кытта ыкса ситимнээхтик үлэлэһэн, улууспутугар филиал суһаллык арылларын ситистибит. Ол курдук, ахсынньы 9-с күнүттэн өрөспүүбүлүкэтээҕи уйулҕа киинин филиала Үөһээ Бүлүүгэ үлэтин саҕалаабыта. Психологическай киин Үөһээ Бүлүүгэ Сбербанк дьиэтин иккис этээһигэр бэнидиэнньиктэн бээтинсэҕэ диэри үлэлиир”.