Үөһээ Бүлүүгэ Өргүөт сэлиэнньэтигэр турбут баһаары умуруорууга суһал ыстаап тэрилиннэ

Үөһээ Бүлүү улууһун Өргүөт сэлиэнньэтин ыксаллаах быһыыга-майгыга хамыыһыйатын быһаарыытынан ойуур баһаарын умуруорууга суһал ыстаап тэрилиннэ. Бу туһунан улуус баһылыга Валерий Николаев телеграм-ханаалыгар иһитиннэрдэ.

Баһаар устатынан минерализованнай балаһаны бэлэмнээтилэр. Уоту умуруорууга Бүлүү улууһун «Авиалесоохранатыттан» 19 үлэһит Тыалааны диэн сиргэ үлэлиир.

Дириҥ-Уулаах диэн күөл аттынан Сунтаар «Авиалесоохранатын» 20 үлэһитэ, Өймөкөөн, Уус Маайа, Алдан оройуоннарын «Якутслесресурсуттан» 19 киһи үлэлииллэр. Сэйэкэ диэн сиргэ минерализованнай балаһаны оҥороллор.

Уот турбут сиригэр тыраахтар, водовоз, үс баһаарынай массыына, бульдозер уонна икки квадроцикл баар.