Үөһээ Бүлүүгэ хаарбах дьиэттэн көспүттэр үөрүүлэрэ үгүс

Кэнники сылларга Арассыыйа Бэрэсидьиэнэ Владимир Путин көҕүлээбит «Олорор дьиэ уонна куорат эйгэтэ» национальнай бырайыак чэрчитинэн хаарбах дьиэттэн көһөрүү бырагырааматынан, элбэх ыал олорор усулуобуйатын тупсарда.

Үөһээ Бүлүү улууһугар эмиэ бу хайысхаҕа кэнники сылларга күүстээх үлэ баран, хаарбах дьиэттэн көһөрүү бырагырааматынан элбэх ыал саҥа дьиэҕэ көһөн үөрүүлэрэ үгүс, махталлара муҥура суох.
Улуус киинигэр элбэх саҥа дьиэ тутуллубутун киирэр аартыктан бэлиэтии көрүөххэ сөп. Ол курдук, ити бырагырааманан быйыл саҥа үлэҕэ киирбит, норуокка номнуо «Титаник» диэн ааттаммыт дьиэҕэ анаан тиийэн көрдүм. Бу үс этээстээх, үс подъезтаах, 68 кыбартыыралаах улуус миэркэтинэн олус улахан дьиэ. Дьиэ куораттыы толору хааччыллыылаах, сып-сырдык, өссө домофоннаах, биһиги бэлэмҥэ киирэн олоробут эрэ диэн олохтоохтор астыммыттарын эттилэр.

Бу дьиэ олохтооҕо Ирина Валерьевна Ботокова кэпсииринэн, саҥа дьиэҕэ 2023 сыл саҕаланыыта көһөн киирбиттэр. Урут Ленин уулуссатын 62-с №-дээх ааспыт үйэ 60-с сылларыгар тутуллубут дьиэҕэ олорбуттар.

«Манна наһаа үчүгэйдик түбэстим, үһүс этээскэ, үһүс подъезка уонна бэйэм олорбут дьиэбинээҕэр иэнэ арыый даҕаны улахан. Саамай астыммыппыт диэн, уулаах-хаардаах, туалеттаах, ванналаах уонна сып-сылаас. «Водоканал» тэрилтэни кытары дуогабардаһан, олор уубутун хааччыйаллар, оннооҕор сууйар массыына туруордубут, онон олус үчүгэй», — диэн кини санаатын үллэстэр.

Бу иннинэ таһырдьа туалеттаах хаарбах дьиэҕэ олорбутун, анаан муус ыллаттаран, ону күн аайы киллэрэн иһэрин, оттон саҥа дьиэҕэ көһөммүт олус абыранныбыт, таһырдьа бөхпүтүн эрэ тоҕо тахсабыт диэн кэпсээтэ.«Маннык бырагыраама олоххо киирэн, кылгас кэм иһигэр түргэн баҕайытык саҥа дьиэ тутуллан, көһөрбүттэриттэн наһаа дьоллоннубут. Хаарбах дьиэттэн, маннык толору хааччыллыылаах дьиэҕэ көспүппүтүттэн, бу дьиэ олохтоохторо бары даҕаны олус үөрдүбүт. Үөрүүбүт муҥура суох. Түгэнинэн туһанан бэйэбит улууспут дьаһалтатыгар, өрөспүүбүлүкэбит баһылыгар уонна дойдубут Бэрэсидьиэнигэр махтанабыт. Бу кэнники сылларга маннык бырагырааманан үбүлэнэн элбэх дьиэ тутулунна, үгүс киһи дьиэлэннэ-уоттанна», — диэн Ирина Ботокова үөрүүтүн үллэһиннэ.

Онтон Үөһээ Бүлүү улууһун дьаһалтатын тутууга, бырамыысыланнаска уонна инфраструктураны сайыннарыыга управлениетын салайааччыта Николай Николаевич Дмитриев: «Үөһээ Бүлүү улууһугар барыта хаарбах дьиэттэн көһөрүү бырагырааматынан 20 дьиэ киириэхтээх. Билиҥҥитэ 9 саҥа таас дьиэ тутуллан үлэҕэ киирдэ, аны 11 тутуллара былааннанар», — диэн кэпсээтэ.