Үөһээ Бүлүүгэ Исиидэр Бараахап аатынан искибиэр аһылынна

Ахсынньы 6 күнүгэр  Үөһээ Бүлүү улууһун административнай киинигэр Исиидэр Бараахап аатынан искибиэр аһылынна. Уопсастыбаннай киэҥ саҥа былаһааккатын арыйыыга Тутуу миниистирэ Виктор Романов кыттыыны ылла.

Үөһээ Бүлүү сэлиэнньэтин килбэйэр киинигэр аһыллыбыт искибиэр «База 14» архитектурнай бюро бырайыагынан тутулунна. Эбийиэк сүрүн тиэмэтинэн Бүлүү өрүс буолар. Тротуар билиитэтин оһуора Бүлүү өрүһү ойуулуур, оттон биэтэгэр кумахтаах, хачыаллаах уонна төгүрүк сылы быһа үлэлиир павильоннаах оҕо оонньуур былаһаакката туруорулунна. Былаһаакка киин сиригэр кэрэ-бэлиэ көстүүтүнэн Исиидэр Бараахапка уонна кини доҕотторугар анаммыт боруонса пааматынньык  буолар.

«Бэдэрээтчит бырайыак сүрүн идиэйэтин олоххо киллэрэр кыахтанна. Искибиэргэ олохтоохтор сынньанар сиринэн буолара саарбахтаммат. Ону кытта сыл бүтүөр диэри  Харбалаах нэһилиэгэр Исиидэр Бараахап аатынан култуура киинэ аһыллыаҕа. Бу икки эбийиэк уһулуччулаах судаарыстыбаннай диэйэтэл, Саха АССР биир төрүттээччи Исидор Бараахап аатын үйэтитии буолар», — диэн Виктор Романов бэлиэтээтэ.

Искибиэр бырайыага Уһук Илин эрэгийиэннэрин ортолоругар табыгастаах куорат бастыҥ бырайыактарын бастакы түһүмэҕин Бүтүн Арассыыйатааҕы куонкуруһун кыайыылааҕынан буолар. 7 сыл иһигэр Саха сирэ  араас куонкурустарга  26 кыайыылаах тахсан,  1,8 млрд солк. тахса федеральнай Граны ылбыта.

Санатан эттэххэ, 2023 сыллаахха Арассыыйа Бэрэсидьиэнэ Владимир Путин сорудаҕын чэрчитинэн Уһук Илиҥҥэ куорат эйгэтин тупсарыы бырайыактарын Бүтүн Арассыыйатааҕы куонкурустара буолан аастылар. Манна Саха Өрөспүүбүлүкэтэ 900 мөлүйүөн солк. суумалаах 10 граны ылбыта. Бу граннартан биэһэ бу сылга түмүктэнэн  олоххо киирэр.