Хаартыска: Сайаана Саввина
Үөһээ Бүлүү улууһугар Олоҥхо дэкээдэтин чэрчитинэн Ф.Н.Тимофеев – Биэчэрэ «Киндили Хаадыат» олоҥхотунан «Түмэн Түүрэй бухатыыр» оҕо олоҥхотун премьерата буолла.
Уон күннэх Олоҥхо дэкээдэтин түмүктэммитин кэннэ сүрүн киэргэппит тэрээһининэн, дьон-сэргэ интэриэһин тарпыт «Киндили Хаадыат” Ф.Н.Тимофеев – Биэчэрэ «Түмэн Түүрэй бухатыыр» олоҥхотунан аан тыллаах, 4 көстүүлээх, 7 хартыыналаах оҕо олоҥхото тэриллэн ыытылынна. Бу туһунан Үөһээ Бүлүүтээҕи Норуот айымньытын киинин пресс-сулууспата суруйар.
Олоҥхону сэргээччилэри бу күн арыылаах алаадьынан айах тутан маанылаатылар, Кирилл Никифоров — Лөкөчөөн олоҥхотунан туруоруллубут испэктээк персонажтарын таҥастарын быыстапкатын көрдөрүүт буолла. Сүрүн оруоллары Н.И. Бойлохов аатынан Үөһээ Бүлүүтээҕи Оҕо ускуустубатын оскуолатын үөрэнээччилэрэ толордулар. Испэктээги туруорааччы режиссер, СӨ култууратын туйгуна Дария Яковлева, сүрүн худуоһунньук СӨ Култууратын уонна үөрэҕириитин туйгуна Майя Саввина, хореографтар Сардана Иванова уонна Уйгулана Павлова күүстэринэн тэрийдилэр. Уратыта диэн Сха сиригэр Оҕо саас сылыгар анаммыта испэктээк тыыннаах муусуканан доҕуһуолланна. Оҕо оркестрын Никифор Афанасьев, фольклор кылааһын учууталлара Марианна Хобусарова уонна Кондратий Герасимов, уус-уран салайааччы Анатолий Иванов, бырайыак ааптара, Олоҥхо дьиэтин дириэктэрэ Алена Босикова салайдылар. Сценарийы Арассыыйа Үөрэҕириитин бочуоттаах үлэһитэ Бурхалей Макаров суруйда.
Бу күн ытык-мааны ыалдьытынан олоҥхо ааптара Ф.Н.Тимофеев — Биэчэрэ хос сиэнэ, Саха Өрөспүүбүлүкэтин Бэчээтин, Култууратын туйгуна, норуокка киэҥник биллэр хоһонноор, ырыалар ааптара Геннадий Бечеряков буолла.
Ити курдук дойдуга Дьиэ кэргэн уонна Саха сиригэр Оҕо саас сылыгар оҕо испэктээгэ дьоһуннаах бэлэҕинэн буолан, олохтоохтоохтор да, ыалдьыттар да сүргэлэрэ көтөҕүллэн, астынан-дуоһуйан тарҕастылар. Улууска олоҥхо дэкээдэтин биир умнуллубат түгэнинэн буолла. Салгыы оҕолор саҥа олоҥхону Хатас сэлиэнньэтин олохтоохторугар «Тускул» сынньалаҥ киинигэр көрдөрүөхтэрэ.
Тэрийээччилэр биир дойдулаахтарыгар, бырайыагы олоххо киирэригэр күүс-көмө, өйөбүл буолбут Сардана Брызгаловаҕа, Саха сиригэр Олоҥхо дьиэлэрин кытары ыкса үлэлэһэр Саргылана Адамоваҕа махтал тылларын тиэрдэллэр.
Нам оройуонугар икки эр киһи ардыларыгар иирсээн тахсыбыт. Түмүгэр биир эр киһи быһаҕынан анньыллан миэстэтигэр…
Дьокуускайга Бааһынай ырыынакка оҕуруот аһын, фрукта сыаналара биллэрдик үрдээбит эбит. Биһиги кэрэспэдьиэммит Бааһынай ырыынака сылдьан…
Бэс ыйын 5 күнүгэр РФ Силиэстийэлиир кэмитиэтин бэрэссэдээтэлэ ВКС эрэсииминэн ыыппыт мунньаҕар Саха сиригэр бэйдиэ…
“Спортивные якутяне” үөрэнээччилэр өрөспүүбүлүкэтээҕи спартакиадаларын түмүктүүр түһүмэҕэр кыттаары өрөспүүбүлүкэ араас муннугуттан 1209 оҕо кэллэ. Бу…
Саха сиригэр бүгүн, бэс ыйын 6 күнүгэр, синоптиктар соҕуруулуу-арҕаа, соҕуруу ардах түһэрин, хотугу оройуоннарынан ардыырын,…
Сулустар тугу кэпсииллэр? Астрологтар туох диэн билгэлииллэр? ХОЙ Барыылаах-кэлиилээх, тэтимнээх нэдиэлэ үүммүт. Арыый уоскуйа түһэр…