Үөһээ Бүлүүгэ олорор дьахтар 6000 солкуобайын уордарбыт

Түбэһиэх дьону кытта арыгыны иһии сэрэхтээҕин туһунан СӨ ИДьМ сэрэтэр.

Ол курдук, Үөһээ Бүлүү олохтооҕо дьахтар киниттэн 6000 солкуобайын уорбуттарын туһунан дьуһуурунай чааска үҥсүү түһэрбит.
Холуобунай ирдэбил үлэһиттэрэ уорууга ким буруйдааҕын булбуттар. Урут эмиэ маннык кыдьыктаах 32 саастаах эр киһи уорбута биллибит.
Харчытыттан ытыс соттубут дьахтар хампаанньаны кытта тэҥҥэ арыгы испит. Аһыы утахтара бүтэн хаалбытыгар ити эр киһи маҕаһыыҥҥа барарга тылламмыт, дьахтартан харчытын ылан баран, баран хаалбыт. Уорбут харчытынан арыгы уонна ас-үөл атыыласпыт.
Онон буруйдаахха холуобунай дьыала тэриллибит, биэс сылга диэри көҥүлэ быһыллыан сөп.

Саха Өрөспүүбүлүкэтин ИДьМ пресс-сулууспатын матырыйаалынан