Үөһээ Бүлүүгэ паарканы тупсарыахтара

Бүгүн Ил Дархан Айсен Николаев үлэтинэн Үөһээ Бүлүүгэ сылдьар. Култуура уонна сынньалаҥ пааркатын кини быһа ааспата.

Тоҕо диэтэххэ манна тупсаран оҥоруу үлэтэ ыытыллыбыта. Ил Дархан бастатан туран, доруобуйаларынан хааччахтаах дьон сылдьалларыгар, сынньаналларыгар усулуобуйата хайдах эбитий, төһө табыгастааҕый диэн көрдө. Хаамалларыгар, кэлэллэригэр-баралларыгар уустуктары көрсөр дьоҥҥо туох да мэһэй суох буолуохтааҕын бэлиэтээтэ. Маны сэргэ, кини тупсаран оҥороллоругар кырдьаҕастар уонна төрөппүттэр оҕолорун кытары күүлэйдииллэригэр  туох да харгыстыыр мэһэй суох буолуохтааҕын эмиэ ыйда.

Былырыын пааркаҕа үлэ ыытылларыгар күүлэйдииргэ, сүүрүүнэн дьарыктанарга суоллара аспаалламмыт, уот-күөс тардыллыбыт. Стадион таһыгар сынньанар сир оҥоһуллубут. Онно киһи мас күлүгэр олоруон уонна стадиоҥҥа ыытыллар күрэхтэһиини көрүөн сөп. Улахан түннүктэрдээх павильоннарыгар кафелаахтар.

Манна даҕатан эттэххэ, Үөһээ Бүлүүгэ Олоҥхо ыһыаҕар улахан тутуулар ыытыллыбыттарын таһынан, өссө үс уопсастыбаннай эйгэ сирдэрэ баар буолбуттара. Куорамыкы кытыла уонна оҕо былаһаакката, паарка тупсарыллыбыттара.

СӨ Ил Дарханын уонна Бырабыыталыстыбатын пресс-сулууспата