Үөһээ Бүлүүгэ суол саахалыгар матасыыкылы ыытааччы тыына быстыбыт

Атырдьах ыйын 10 күнүгэр сарсыарда 10 чаас саҕана «Бүлүү» федеральнай суол 617-с км Үөһээ Бүлүү улууһун Харбалаах сэлиэнньэтин таһыгар суол быһылаана таҕыста.

1998 сыллаах төрүөх суоппар судаарыстыбаннай бэлиэтэ суох «SPR MOTORS CROSS ROAD» матасыыкылынан айаннаан иһэн, утары иһэр балаһаҕа тахсан биэрэн, 1977 сыллаах төрүөх суоппардаах «Тойота Вокси» массыынаны кытта харсыспыт. Бу быһылаан түмүгэр матасыыкылы ыытааччы тутатына тыына быстыбыт.

«Массыына суоппара  курунан баанан олорбута, быһылааҥҥа эчэйбэтэҕэ билиннэ. Арыгы испэтэх,  силиэстийэлиир бөлөх үлэлиир», – диэн СӨ Госавтоинспекция пресс-сулууспата иһитиннэрэр.