Үөһээ Бүлүүгэ ситэриилээх былаас отчуота түмүктэннэ

Бүгүн, олунньу 17 күнүгэр, Саха Өрөспүүбүлүкэтин Бырабыыталыстыбатын отчуоттуур бөлөҕө Үөһээ Бүлүү улууһугар 2022 сыллааҕы үлэтин түмүгүн оройуоннааҕы култуура дьиэтигэр ыытта. Улуус киинин олохтоохторо түмүктүүр мунньахха көхтөөхтүк кытыннылар. Үөһээ Бүлүү улууһугар отчуоттуур бөлөх салайааччыта СӨ тырааныспарын уонна суол хаһаайыстыбатын миниистирэ Владимир Сивцев нэһилиэктэргэ сырыытын түмүгүн таһаарда. Үөһээ Бүлүү улууһун баһылыга Владимир Поскачин икки күн нэһилиэктэринэн сылдьан тыа нэһилиэктэрэ сөптөөх боппуруостары туруорсубуттарын бэлиэтээтэ.

Бэлиэтээн эттэххэ, бүгүҥҥү түмүктүүр мунньахха улуустан Ил Түмэн дьокутаата Феодосия Габышева кыттыыны ылла. Норуот дьокутаата өрөспүүбүлүкэҕэ ылыллыбыт саҥа сокуоннар тустарынан кэпсээтэ.
Мунньах саҕаланыыта миниистир Владимир Сивцев Үөһээ Бүлүү олохтоохторугар Бырабыыталыстыба наҕараадаларын туттарда. Саха АССР төрүттэммитэ 100 сыллаах үбүлүөйүн бэлиэтин Николай Еттяновка, Григорий Андреевка, «СӨ автомобильнай тырааныспарын бочуоттаах үлэһитэ» бэлиэни «Үөһээ Бүлүү» ХЭТ суоппара Анатолий Герасимов, 4-с №-дээх Д.С. Спиридонов аатынан орто оскуола суоппара Владимир Седалищев, Доруобуйа харыстабылыгар кылааттарын иһин бэлиэтэннилэр. «СӨ доруобуйа харыстабылын туйгуна» бэлиэни улуустааҕы киин балыыһа санитарката Ульяна Ананьева,медсиэстэрэ Сааскылаана Барахова-Корякина, профилактика кабинетын мэдиссиинэ сиэстэрэтэ Ольга Тумусова уонна акушерка Лариса Уйгурова анал бэлиэнэн наҕараадаланнылар.
Улуус успуорка управлениетын начальнига Егор Николаев саанан ытыы тирэх баазатын тэрийэн, оҕолору дьарыктыырга усулуобуйаны тэрийэргэ успуорт министиэристибэтэ көмөлөһөрүгэр көрдөстө.
Үөһээ Бүлүүтээҕи 2-с №-дээх М.Т. Егоров аатынан орто оскуола дириэктэрэ Алексей Федоров саҥа оскуола тутуутун уонна учууталлар хамнастарын үрдэтиини туруоруста.
Үөһээ Бүлүү нэһилиэгин дьокутаата Леонид Михайлов элбэх оҕолоох эдэр ыалга көрүллэр субсидияны бэрэдэктээһини туруоруста. Онуоха отчуоттуур бөлөх чилиэннэрэ Бырабыыталыстыбата ити боппуруоска үлэлэһэрин эттэ.
Үөһээ Бүлүүгэ 2022 сылга эдэр ыал субсидиятын туһаныыга 22 ыалга 25 мөлүйүөн солк. туттуллубут.
Иккис боппуруоһунан онкология ыарыытын элбээбитин, онно анал эмтиир сир наадата этиллибитэ. Онно 180 миэстэлээх онкология салаата быйыл былааннанара этилиннэ.
Улуустааҕы ойуур хаһаайыстыбатын салайааччыта Павел Тимофеев үлэлиир дьиэлэрэ хаарбах туруктааҕын, баһаар тахсар түгэнигэр тиэхиньикэтэ суох буолан, бытаарыы тахсарын, ол кэннэ буруйдаах лесник буоларын эттэ. Ону таһынан хамнас кырата эмиэ ахтылынна. Кэнники сылга хамнас алын кээмэйигэр тэҥнэнэрин, уопсайынан, хамнаска болҕомто ууруллуо диэн быһаардылар.
«Инблавер» тэрилтэ салайааччыта Иван Николаев гаас сапыраапкатын туруоруста.
Үөһээ бүлүүлэр быстах дьайыыларга сылдьар дьон кэргэттэрэ хаһаайыстыбалаах, ходуһалаах буолан, онтулара баайдаах курдук көстөн, көмөттөн аккаастыыр түгэннэрэ элбэх диэн эттилэр. Ону, отчуоттуур бөлөх боротокуолга киллэрэн быһаарыах буолла.
Быстах дьайыыга хантарааҕынан сылдьар оҕо ийэтэ Валентина Тарасова уолаттар үөрэххэ киирэн баран, үрдүк истипиэндийэни кыайан ылбатахтарын туруоруста. Аны аан бастаан быстах дьайыыга аармыйаҕа сулууспалыы сылдьан барбыт уолаттар, бэтэрээн буолар кыахтара суоҕа кыһалҕаны үөскэппитин эттилэр. Итинтэн да атын кыһалҕалар үөскээбиттэрин олохтоохтор этиннилэр. Боппуруостары барытын боротокуолга киллэрэн, үөрэтэн көрөн баран, быһаарыахпыт диэтилэр.

Мунньах түмүгүнэн истрическай билим дуоктара Никита Архипов ытык кырдьаҕас быһыытынан сүбэтин эттэ уонна Бырабыыталыстыба ааспыт сыллааҕы отчуотун үчүгэйинэн сыаналыахха диэн бар дьонун ыҥырда.