Үөһээ Бүлүүгэ сүппүт аҕам саастаах булчут өлүгүн буллулар

Үөһээ Бүлүү улууһугар хас да хонуктааҕыта сүппүт аҕам саастаах булчут өлүгүн буллулар. Бу туһунан быһылаан тахсыбыт сиригэр үлэлээбит Саха сиринээҕи Быыһыыр сулууспатын Үөһээ Бүлүүтээҕи көрдүүр-быыһыыр этэрээтин быыһааччылара иһитиннэрдилэр.

Булчут өлүгүн булчут өтөҕүттэн икки килэмиэтир тэйиччи сиртэн буллулар. Дьиэ таһыгар сүппүт киһи биир ыта баайылла сылдьара көстүбүт, оттон иккис ытын уонна миинэ сылдьыбыт атын дьылҕата билиҥҥитэ биллибэт. Сиһилии иһитиннэрии көрдүүр бөлөх нэһилиэнньэлээх пууҥҥа төннөн кэлбитин кэннэ бэриллиэҕэ.

Санатан эттэххэ, алтынньы 25 күнүгэр Туобуйа сэлиэнньэтиттэн «Кыыс Күөл» («Бодомо») диэн сиргэ бултуу барбыт эр киһи сэтинньи 4 күнүгэр көрдөбүлгэ биллэриллибитэ. Бастаан олохтоохтор көрдөөбүттэрэ, онтон сэтинньи 6 күнүттэн кинилэргэ быыһааччылар холбоспуттара. Туобуйа сэлиэнньэтэ – Үөһээ Бүлүү улууһун биир саамай ыраах нэһилиэгэ, улуус кииниттэн 300 килэмиэтир тэйиччи сытар.