Үөһээ Бүлүүгэ сүппүт киһини көрдөөһүн тохтотулунна

Саха сирин быыһыыр сулууспатын быыһааччыларын бөлөҕө Валерий Андросов салайааччылаах Үөһээ Бүлүү оройуонугар сураҕа суох сүппүт 1957 с.т. эр киһини ыам ыйын 28 күнүттэн көрдөөбүттэрэ. Кини ыам ыйын 7 күнүгэр сүппүтэ.

Санаттахха, үс булчут Маай учаастагар Сунтаат диэн сиргэ Түүкээн үрэҕи туораан Ньурба территориятыгар тахсыбыттар. Аара суолга биир киһилэрэ сүтэн хаалбыт. Икки киһи күүтэ сатаан баран, төттөрү барбыттар. Суол устун төннөн иһэн, дэриэбинэҕэ төттөрү айаннаабыт суолун көрбүттэр. Дэриэбинэҕэ кинини эмиэ булбатахтар, ол иһин төттөрү учаастакка айаннаабыттар. Бу туһунан Саха сиринээҕи Быыһыыр сулууспатын пресс-сулууспата суруйар.

Бэйэлэрин күүстэринэн көрдүү сатаан баран, ыам ыйын 19 күнүгэр биирдэ биллэрбиттэр. Ыам ыйын 19 күнүттэн киһини көрдөөһүҥҥэ олохтоох дьон кыттыспыттар. Ыам ыйын 20 күнүгэр Ньурба быыһааччылара кэлбиттэр.

Сүппүт киһи атаҕын суолун уонна хонон турбут сирин булбуттар.Ыам ыйын 28 күнүгэр Үөһээ Бүлүү оройуонугар массыынанан, оҥочонон, БПЛА-нан көрдүү быыһааччылар тахсыбыттар. Көрдөөһүҥҥэ Ньурба быыһааччылара, Бүлүү көрдүүр-быыһыыр этэрээт быыһааччылара, полиция үлэһиттэрэ, волонтердар үлэлээбиттэр. Эр киһи көстүбэтэх.

Бүгүн, бэс ыйын 8 күнүгэр, көрдөөһүн үлэтэ тохтотулунна. Дьокуускайтан быыһааччылар бөлөхтөрө Дьокуускай куоракка төнүннүлэр. Ньурба көрдүүр-быыһыыр этэрээтин быыһааччылара Түүкээн үрэххэ БПЛА көмөтүнэн салгыы көрдүөхтэрэ.