Үөһээ Бүлүүгэ тыа хаһаайыстыбатын эйгэтигэр түөкүннээһиҥҥэ  бириигэбэр таһаарылынна

Дьокуускай куорат суута Үөһээ Бүлүү оройуонун «Тыа хаһаайыстыбатын управлениета» тэрилтэ урукку салайааччытыгар уонна кэммиэрчэскэй тэрилтэлэр икки дириэктэрдэригэр бириигэбэр таһаарда. Бу туһунан ИДьМ пресс-сулууспата иһитиннэрэр.

Холуобунай дьыаланы силиэстийэлээһин түмүгүнэн, ИДьМ Силиэстийэлиир управлениета тэриллиилээх буруйу оҥорууну силиэстийэлиир чааһын силиэдэбэтэлэ урукку муниципальнай сулууспалаахха, буруйу оҥорор бөлөҕү тэрийбит 57 саастаах киһиэхэ уонна тыа хаһаайыстыбатын тэрилтэтин 52 саастаах салайааччытыгар 11 түбэлтэҕэ буруйдаабыттар.

Чинчийиинэн, 2019 сыллаахха «Үөһээ Бүлүү улууһа (оройуона)» муниципальнай оройуон тыа хаһаайыстыбатын эйгэтигэр субсидияны түҥэтиигэ эппиэттиир «Тыа хаһаайыстыбатын управлениета» МКТ урукку салайааччыта тэриллиилээх бөлөҕү тэрийбит уонна  сүөһү аһылыгын, сиэмэни атыылыыр-тиэйэр фирма салайааччытын кытыннарбыт. Саха Өрөспүүбүлүкэтин бүддьүөтүгэр оҥоһуллубут хоромньу уопсай суумата, ол иһигэр «Дьоҕус уонна орто урбаан уонна биирдиилээн урбаанньыт көҕүлээһинин өйөөһүн» национальнай бырайыак чэрчитинэн, 10 мөлүйүөн солкуобайтан тахса буолбут.

Бөлөҕү тэрийээччи 7 сылга көҥүлэ быһыллан уопсай эрэсиимнээх көннөрөр холуонньаҕа хаайылынна. Урукку салайааччы 2 сыл болдьоххо судаарыстыбаннай уорганнарга уонна олохтоох салайыныы уорганнарыгар дуоһунаска үлэлиир бырааба быһылынна. Бөлөх иккис кыттааччыта, 52 саастаах дьахтар, 4 сылга көҥүлэ быһыллан уопсай эрэсиимнээх көннөрөр холуонньаҕа ыытылынна. Бириигэбэр иһитиннэриллибитин кэннэ, буруйдаахтар суут саалатыттан хаайылыннылар. Кинилэр көмөлөһөөччүлэригэр, 34 саастаах тыа хаһаайыстыбатын кээпэрэтиибин бэрэссэдээтэлигэр, 3 сыл тургутар болдьохтоох 5 сылга көҥүлэ быһылынна. Ону таһынан, суут эмсэҕэлээбит өрүт 10 мөл. солк. тахса уопсай суумалаах хоромньуну толуйтарар туһунан гражданскай ирдэбилин толордо. Бириигэбэр сокуоннай күүһүгэр киирэ илик.