Хаартыска 15 №-дээх Үөһээ Бүлүү-Горнай биир мандааттаах уокурук быыбардыыр хамыыһыйатыттан
Быйылгы үс күннээх быыбарга куоластааһын хаамыытын көрдөххө, Үөһээ Бүлүү улууһа быыбардааччыларын кыттыытын ахсаанынан бастыҥ көрдөрүүлээхтэр кэккэлэригэр иһэр.
Быыбар хаамыытын туһунан 15 №-дээх Үөһээ Бүлүү-Горнай биир мандааттаах уокурук быыбардыыр хамыыһыйатын бэрэссэдээтэлин солбуйааччы Александра Иванова бу курдук кэпсиир:
— Бүгүн, балаҕан ыйын 10 күнүн, 15:00 ч. барыллаан ааҕыынан, 11207 быыбардааччыттан 7552 киһи куоластаата, ол аата 67,39 % буолла. Улууска барыта 34 быыбардыыр учаастактаахпыт. Нэһилиэнньэбит быыбарга кыттыыта көхтөөх, быыбардааччыларбыт кэлэ тураллар.
Сокуоннай саастарын ситэн, аан маҥнай куоластыыр быыбардааччыларбыт олус көхтөөхтүк кытталлар. Кэккэ быыбардыыр учаастактарга аан маҥнайгы быыбардааччыларга ураты болҕомто уураллар, өйдөбүнньүк бэлэхтэри туттараллар. Холобур, Мэйик нэһилиэгэр киирсэр 29 быыбардааччылаах Маай учаастагар 97-с №-дээх быыбардыыр учаастакка олохторугар аан бастаан быыбарга кыттыбыт ыччаттарга блокнот уонна минньигэс ас бэлэхтээтилэр. Бу кыракый учаастак 91 % куоластаата, дьоно-сэргэтэ быыбар күннэригэр олус сэргэхсийбиттэрин этэллэр. Кэккэ быыбардыыр учаастактарбытыгар көрдөрүүлэрэ үчүгэй, онон 100 % куоластааһыҥҥа ылаллара буолуо диэн сабаҕалыыбын.
Быыбар хаамыытын кэтээн көрөөччүлэр даҕаны быйыл элбэхтэр. Хандьыдааттартан, баартыйалартан уонна уопсастыбаннай балаататтан бааллар.
Быйылгы быыбарга ыччат дьон сарсыарда 8 ч. кэлэн, кыттан соһутта, урукку өттүгэр бу кэмҥэ орто уонна аҕам саастаах дьон кэлэрэ, онон эдэрдэр куоластааһыҥҥа көхтөрө өссө үрдээбит диэххэ сөп. Оттон урукку кэмнэргэ дьиэлэригэр ыҥыран куоластыыр аҕам саастаах быыбардааччыларбыт быйыл бэйэлэрэ быыбардыыр учаастакка кэлэннэр соһуттулар.
Биһиги улууспут быыбардааччылара бу үс күҥҥэ көхтөөхтүк кытта сылдьаллар, онон бэрт көрдөрүүлээхпит. Бүгүн сарсыарда куоластааһын 65 % этэ, эбиэт кэннэ 67 % тиийдэ. Быыбарга кыттыы урут да үчүгэй буолааччы, улуус олохтоохторо куоластааһын суолтатын өйдүүллэр, онон бу да сырыыга 80 %-н тахсаны ылыахпыт диэн эрэллээхпит.
Бэҕэһээ, атырдьах ыйын 1 күнүгэр, Абый улууһугар ууга былдьаммыт иккис киһи өлүгэ көһүннэ диэн СӨ…
Бу күн куйаар энергията чаҕылхай Хахай бэлиэтигэр киирэр, ол иһин барыбытыгар күүс-уох, бэйэни көрдөрүүгэ баҕа,…
Бүгүн – Ылдьыын күнэ. Бу күн эһэлэрбит, эбэлэрбит хортуоппуйдарын амсайаллара, хостонуор диэри өссө төһө улаатыан…
Бүгүн, атырдьах ыйын 2 күнүгэр, Саха сирин сорох улуустарыгар этиҥнээх ардах түһэрэ, тыалырара, итиэннэ +28…
От ыйын 31 күнүгэр сарсыарда 8 чаас саҕана «Нам» айан суол 10-с биэрэстэтигэр массыыналар харсыһыыларынан…
Аллайыахаҕа хайдах күн-дьыл буолбутун туһунан Чокуурдаах олохтооҕо Иван Иванов маннык суруйда: -- Биһиэхэ сайыммыт бүттэ.…