Үөһээ Дьааҥы Суордааҕын баһылыга бүддьүөт үбүн-харчытын сокуоннайа суох туһаммыт

Силиэстийэлээччилэр Үөһээ Дьааҥы улууһун Суордаах нэһилиэгин баһылыга бүддьүөт үбүн-харчытын сокуоннайа суох туһаныытын туһунан холуобунай дьыаланы түмүктээтилэр.

Бу туһунан Саха сиринээҕи Силиэстийэлиир кэмитиэтигэр иһитиннэрдилэр. Силиэстийэ чахчыларынан, 2019 сыл ахсынньы ыйыттан 2022 сыл ахсынньытыгар диэри буруйданааччы дуоһунаһын туһанан, сыл түмүгүнэн үлэһиттэригэр үрдүк бириэмийэлэри аныыр туһунан дьаһаллары таһаарбыт. Ол кэннэ үлэһиттэригэр түспүт бириэмийэ сорҕотун төнүннэрэргэ модьуйбут. Үбү-харчыны биир идэлээхтэрэ кумааҕы харчынан туттарбыттар, ону сэргэ баһылык чугас аймахтарын баанын счетугар ыыппыттар. Буруйдаах бүддьүөккэ таһаарбыт хоромньуну толору билиннэ,  ону кытта харчыны төнүннэрдэ диэн силиэстийэлээччилэр биллэрдилэр. Холуобунай дьыалаҕа дакаастыыр баазаны булууга туһааннаах дьаһаллар уонна наадалаах силиэстийэлиир үлэ ыытылынна.

Үөһээ Дьааҥы оройуон борокуратуурата ыыппыт матырыйаалларынан холуобунай дьыала тэрилиннэ.