Үөһээ Дьааҥыга тахсыбыт быһылаан Бастрыкин хонтуруолугар

Бу күннэргэ социальнай ситимнэринэн  хоту улууска биир кыыһы уолаттар кырбаан баран  сыбаалкаҕа бырахпыттар үһү диэн сурах тарҕаммыта. Онтубут дьиҥнээх олоххо буолбута быһаарыллыбыта.

Арассыыйа Силиэстийэлиир кэмитиэтин бэрэссэдээтэлэ Үөһээ Дьааҥы улууһугар тахсыбыт  холуобунай дьыаланан хас да соругу биэрбитин туһунан  Арассыыйа Силиэстийэлиир кэмитиэтин информационнай киинэ  иһитиннэрдэ.

«Сонуну киэҥник  тарҕатар ситимнэргэ суруйбуттарынан, Саха Өрөспүүбүлүкэтин Үөһээ Дьааҥы улууһугар үс эдэр уол 16 саастаах кыыһы кырбаабыттар. Ол кэннэ биир уол кыыһы күүһүлээбит. Кыысчаан өлбүт быһыылаах дии санааннар, эмсэҕэлээччини  кистии сатаабыттар. Билигин кыыс ыарахан туруктаах балыыһаҕа сытар.  СӨ Силиэстийэлиир кэмитиэтэ туһааннаах быһылаанынан РФ Холуобунай кодексын  131 ыстатыйатынан холуобунай дьыала көбүппүт.  Биир уолу тутан хаайбыттар.  Арассыыйа Силиэстийэлиир кэмитиэтин бэрэссэдээтэлэ Александр Иванович Бастрыкин СӨ Силиэстийэлиир кэмитиэтин салайааччыта Виталий Викторович Кондратенкоҕа туһааннаах быһылааҥҥа кыттыгастаахтары барыларын тутаттыыр туһунан уонна холуобунай дьыала хаамыытын дакылааттыылларыгар сорудахтаата«, —  диэн    Арассыыйа Силиэстийэлиир кэмитиэтин информационнай киинэ суруйар.