Үөрэҕи сайыннарар уонна идэ таһымын үрдэтэр институт дириэктэрэ ананна

С.Н.Донской-II аатынан Үөрэҕи сайыннарар уонна идэ таһымын үрдэтэр институт педагогическай кэлэктиибэ институт саҥа дириэктэринэн анаммыт Михаил Колмаковы көрүстэ. Санатан эттэххэ, бу иннинэ дириэктэринэн олорбут Ньургун Павлов ыам ыйыттан үөрэх уонна билим миниистирин бастакы солбуйааччынан үлэлиир.

Михаил Николаевич – үгүс уопуттаах, математика учууталыттан, оскуола дириэктэриттэн, Мэҥэ Хаҥалас улууһун үөрэҕин управлениетын начаалынньыгыттан саҕалаан, Рособрнадзор департаменын салайааччытыгар тиийэ үөрэх бары таһымыгар үлэлээбитэ.

Көрсүһүүгэ тэрилтэ дьаһалтата, идэлээх сойуус тэрилтэтэ, педагогическай кэлэктиип Михаил Николаевичка улахан эрэллээхтэрин, үөрэх хаачыстыбатын тупсарыыга бииргэ үлэлииргэ бэлэмнэрин эттилэр уонна саҥа дуоһунаһыгар ситиһиилэри баҕардылар. Бу туһунан Үөрэҕи сайыннарар уонна идэ таһымын үрдэтэр институт саайтыгар суруйаллар.