Оҕолору арыаллааччыларга идэ таһымын үрдэтэр кууруһу ыыталлар

С.Н.Донской-II аатынан институт үлэһиттэрэ оҕолору арыаллааччыларга «Традиционные игры и национальные виды спорта народов РФ в современной системе физического воспитания» диэн ааттаах идэ таһымын үрдэтэр кууруһу ыыталлар.

Санатан эттэххэ, Дьокуускай куоракка дойду 81 эрэгийиэниттэн 115 арыаллааччы кэлбитэ тэрээһин киэҥ далааһыннааҕын уонна суолталааҕын бэлиэтиир. Олимпиадаҕа кыттар оҕолор теорияҕа уонна быраактыкаҕа тургутуулары туттарар кэмнэригэр, кинилэри арыаллааччылар үөрэх хаамыытыгар көхтөөхтүк кытталлар. Кууруска үөрэнээччилэргэ  юридическай билим дуоктара, сахалыы ыстаныыларга, оҕунан ытыыга РСФСР уонна РФ успуордун маастара, “Сахаада-спорт” Саха сирин норуоттарын төрүт көрүҥнэрин уонна оонньууларын ассоциациятын бэрэсидьиэнэ Александр Ким-Кимэн, оҕунан ытыыга Арассыыйа успуордун маастара, өрөспүүбүлүкэ хас да төгүллээх чөмпүйүөнэ, Европа Куубагын хаһаайына, аан дойдуга, Европаҕа, Арассыыйаҕа биирдиилээн бастыыр иһин күрэхтэһиилэр, чөмпүйэнээттэр кыайыылааҕа, призера Розалина Кириллина уонна “Юные якутяне” өрөспүүбүлүкэтээҕи ресурснай киин дириэктэрин бастакы солбуйааччы Александр Брызгалов лиэксийэ аахтылар.

Александр Николаевич Ким-Кимэн хапсаҕай, мас тардыһыытын, сахалыы ыстаныылар туһунан сиһилии кэпсээтэ. Розалина Владимировна “Азия оҕолоро” оонньуулар сайдыыларын, ыытыллыытын туһунан билиһиннэрдэ. Үөрэнээччилэр саамай маассабай “Спортивные якутяне” күрэхтэһиилэрэ хайдах барарын Александр Романович Брызгалов сырдатта.

С.Н.Донской аатынан үөрэҕи сайыннарар уонна идэ таһымын үрдэтэр институт дириэктэрэ Ньургун Михайлович Павлов этэринэн, куурус иитинэн Манчаары Баһылай аатынан успуорт төрүт көрүҥнэрин киинигэр экскурсия былааннанар. Онно маастар-кылаастары ыытыахтара уонна төрүт көрүҥнэргэ быраактыкаҕа дьарык, педагогическай мастарыскыай, таллааннаах оҕолору кытта үлэҕэ бастыҥ быраактыкалаах үөрэх тэрилтэлэригэр экскурсиялар буолуохтара. Бу туһунан Үөрэх уонна билим министиэристибэтин пресс-сулууспата суруйар.