Үөрэх дьылын иннинэ суолга куттал суох буолуутун миэрэлэрин күүһүрдэллэр

Дьокуускайга Саха Өрөспүүбүлүкэтин суолга куттал суох буолуутун хааччыйар Бырабыыталыстыбаннай хамыыһыйатын уочарата суох мунньаҕа буолан ааста.

СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовников бэлиэтээбитинэн, сыл саҕаланыаҕыттан эрэгийиэн суолларыгар 499 суол быһылаана  бэлиэтэммит, бу былырыыҥҥы кэми кытта тэҥнээтэххэ 0,6%-нан элбэх.

Суол быһылаанын түмүгэр 52 киһи олоҕо быстыбыт. «Хомойуох иһин, улуустарга оҕолор кыттыылаах элбэх быһылаан тахсыбыта бэлиэтэнэр. Саҥа үөрэх дьылын иннинэ биһиги бу проблемаҕа улахан болҕомтону уурабыт уонна муниципальнай тэриллиилэри кытта үлэни күүһүрдэбит», — диэн Дмитрий Садовников бэлиэтээтэ.

ИДьМ сулууспатын ГАИ управлениетын начаалынньыга Александр Архипов бэлиэтээбитинэн, мунньахха суол быһылааннарын кытта сибээстээх балаһыанньаны туруктаах оҥорууга, өрөспүүбүлүкэ сиригэр-уотугар өлүү-сүтүү ахсаанын аҕыйатыыга уонна РФ Бэрэсидьиэнэ Владимир Путин көҕүлээбит «Олоххо анаммыт инфраструктура» национальнай бырайыагын чэрчитинэн «Суолга куттал суох буолуута» федеральнай бырайыагы олоххо киллэриигэ сыһыаннаах сүрүн боппуруостары дьүүллэстилэр.

«Оҕо суол быһылааныгар эчэйиитин боппуруостарыгар ураты болҕомто уурулунна, тоҕо диэтэххэ оҕолор суолга  саамай көмүскэлэ суох араҥанан буолаллар. Саҥа үөрэх дьылын иннинэ биһиги муниципальнай тэриллиилэр баһылыктарыгар оскуола оҕолорун суолга сэрэхтээхтик сылдьыы туһунан билиини үрдэтэр тэрээһиннэри ыытарга сөптөөх сүбэлэри уонна сорудахтары биэрдибит», — диэн Александр Архипов бэлиэтээтэ. Ону таһынан, оҕону таһыы быраабылаларын уонна оскуола оптуобустарыгар ирдэбиллэри тутуһуу боппуруостара, ону тэҥэ Саха сиригэр суолга куттал суох буолуутун үрдэтиигэ быһаччы дьайар атын миэрэлэр көрүлүннүлэр.