Үөрэх миниистирэ Нюргуна Соколова Нам улууһугар үлэлээтэ

Бастакы Хомустаах нэһилиэгэр «Улыбка» оҕо уһуйааныгар уонна «Сайдыы» оҕо сайдар киинигэр сылдьан тэрилтэлэр дьиэлэрин, хааччыллыыларын көрдө-иһиттэ. Онтон «Тиһэх чуораан» тэрээһинигэр кыттыыны ылла.

Д.Ф. Алексеев аатынан Бастакы Хомустаах орто оскуолатыгар уопсайа 238 оҕо үөрэнэр. Быйыл 9-с кылааһы 25 уонна 11-с кылааһы 15 үөрэнээччи бүтэрэр. Үөрүүлээх тэрээһиҥҥэ оскуола директора Ульяна Атласова, СӨ үөрэх уонна билим  миниистирэ Нюргуна Соколова, улуус баһылыга Юрий Слепцов, улуустааҕы үөрэх управлениетын начальнига Мария Игнатьева уонна Хомустаах Бастакы нэһилиэгин баһылыга Василий Жирков оскуола оҕолорун, учууталлары, төрөппүттэри эҕэрдэлээтилэр.

Салгыы Нюргуна Афанасьевна халаан уутугар эмсэҕэлээбит нэһилиэктэргэ баар үөрэх объектарын көрдө. Кинини кытта улуус баһылыга Юрий Слепцов, улуустааҕы үөрэх управлениетын начальнига Мария Игнатьева үлэлээтилэр.

Бастаан 100% ууга барбыт Маймаҕа нэһилиэгэр оскуола-саад дьиэтигэр сырыттылар. Бу тэрилтэ олоччу ууга баран туох баар үөрэх пособиелара, компьютернай техникалара барыта ууга былдьанан киһи туһанара суох. Оттон уһуйаан дьиэтэ олох эргэ буолан, оҕо сылдьар, киһи үлэлиир да усулуобуйута суох буолбут. Онон, маныаха күүстээх болҕомто ууруллан, бу боппуруоһу быһаарыыга үлэ барыаҕа диэн миниистир эттэ. 2024-2025 үөрэх сылыгар оскуола-саад быстах кэмҥэ үөрэнэр объегын быһаарар сыалтан билигин быстах олорор пуун буолан турар культурнай-спортивнай комплексы көрдүлэр.

М.К. Аммосов аатынан Хатырык орто оскуолата бу халаан кэмигэр быстах олорор пуун буолан турбута. Аҕыйах хонугунан биир кэлим экзаменнар буолуохтара. Онно бары өттүнэн эппиэттиир гына үлэни тэрийэргэ бэлэмнэнии, сууйуу-сотуу үлэлэрэ ыытыллаллар.

Салгыы 6 оҕолоох Анжела уонна Алексей Шадриннар дьиэ кэргэттэригэр сылдьан кэпсэттилэр. Элбэх оҕолоох дьиэ кэргэн улахан уоллара быйыл оскуоланы бүтэрэр. Икки сыллааҕыта киирбит дьиэлэрэ, туох баар маллара-саллара ууга баран улахан хоромньуну көрсөн олороллор. Билигин сууйуу-сотуу, куурдуу-хатарыы үлэтин ыыта сылдьаллар. Кэлэн көмөлөһөр тэрилтэлэргэ, волонтердарга махтаналлар.

Бүтэһик пуунунан эмиэ 100% ууга барбыт Граф Биэрэгэр «Ромашка» уһуйаан, Затон ситэтэ суох орто оскуолатын уонна Намнааҕы техникум объектарын көрдүлэр. Бу тэрилтэлэргэ билигин күүстээх субуотунньуктар ыытылла тураллар. Ол курдук, муосталарын маһын көтүрэн куурдуу үлэтэ ыытыллар. Улаханнык эмсэҕэлээбит объектарга өрөмүөн үлэтин ыытыллыытын үбүлээһинин, үлэ барылын кэпсэттилэр.

Ону сэргэ Нюргуна Афанасьевна Намнааҕы техникум коллективын кытта көрсөн мунньахтаата. Бу бөһүөлэккэ СӨ үөрэҕин уонна билимин министиэристибэтэ сыһыарыллыбыта. Онон, салгыы туох үлэлэр барыахтаахтарын, үлэ былаанын кэпсэттилэр.

Бу сырыы кэнниттэн боротокуол тахсан, үлэ торума оҥоһуллан сөптөөх көмө бэрээдэгэ көрүллэн, үөрэх объектарын чөлүгэр түһэрии бириэмэтигэр ыытыллыа диэн эрэнэбит.

«Нам улууһа» МТ пресс-сулууспата