Үөрэх министиэристибэтин иитинэн хомуурга ыҥырыллыбыттар оҕолоругар биэс суол өйөбүл көрүллэр

Хомуургу ыҥырыллыбыт байыаннай сулууспалаахтар дьиэ кэргэттэригэр көрүллэр миэрэлэринэн бүгүн СӨ үөрэҕин уонна билимин миниистирин бастакы солбуйааччы Алевтина Аргунова брифинг биэрдэ. Сүрүн ыйытыыларга хоруйдары сырдатабыт.

Ыйытыы: СӨ Үөрэҕин уонна билимин министиэристибэтин иитинэн хомуурга ыҥырыллыбыттар дьиэ кэргэттэрин өйүүр төһө элбэх миэрэ баарый?

Хоруй: Биһиги министиэристибэбит иһинэн, уопсайа, биэс миэрэ баар:

— уһуйааҥҥа сылдьар оҕолоох төрөппүттэри төлөбүртэн босхолооһун;

— 5-11 кылаас үөрэнээччилэрин босхо, итии аһылыгынан хааччыйыы;

— өрөспүүбүлүкэ иһинээҕи лааҕырдарга доруобуйаны бөҕөргөтөр симиэнэлэргэ босхо путевканы көрүү;

— орто уонна үрдүк үөрэх устудьуоннарыгар анал истипиэндьийэни көрүү;

— Орто уонна үрдүк үөрэх тэрилтэлэригэр тус сыаллаах (целевые) миэстэни көрүү.

Ыйытыы: Ити көмөнү туһанарга сайабыалыанньаларын ханна биэрэллэрий?

Хоруй: Бары сайабылыанньалары МФЦ нөҥүө биэрэллэр. Холобур, бэҕэһээ 60, бүгүн 9 сайабылыанньа киирдэ. Улуустааҕы үөрэх управлениеларыгар суһал ыстааптар тэриллэн үлэлииллэр. СӨ Үөрэҕин уонна билимин министиэристибэтигэр +7 (4112) 506-989 нүөмэринэн “горячай линия” үлэлиир.

Ыйытыы: Бүгүҥҥү туругунан, уопсайа, төһө элбэх оҕо итии аһылыгынан хааччылынна?

Хоруй: Саха сиригэр 5-11 кылааска 86 381 оҕо үөрэнэр. Олортон 40 429 оҕо чэпчэтиинэн (льготнай категория) туһанан босхо аһыыр. Биһиги нэһилиэнньэҕэ иһитиннэрэр үлэни ыытыахтаахпыт. Бэҕэһээ киэһээҥҥи чахчынан, 799 сайабылыанньа киирэн турар.

Сайабылыанньа биһиэхэ (МФЦ нөҥүө) киирбитин кэннэ үс күн иһигэр хоруйдуохтаахпыт.

Ыйытыы: Устудьуоннарга көрүллэр анал истипиэндьийэ суумата төһөнүй?

Хоруй: Бэҕэһээҥҥи туругунан, 12 оҕоҕо истипиэндьийэ ананна. Маныаха устудьуон үөрэҕин хаачыстыбатыттан, академическай истипиэндьийэтиттэн тулуга суох эбии көрүллэр анал истипиэндьийэни ылар бырааптаах. Суумата 5 607 солк. тэҥнэһэр.

Ыйытыы: Тус сыаллаах үөрэх (целевой) туһунан быһааран биэрэриҥ буоллар.

Хоруй: Өскөтүн хомуурга ыҥырыллыбыт байыаннаай сулууспалаах оҕото төлөөн үөрэнэ сылдьар түгэнигэр, тус сыаллаах үөрэх (целевой) дуогабарыгар сөбүлэһэр буоллаҕына, сайабылыанньа биэрэн төлөбүрдээхтэн босхоҕо көһүөн сөп. Бүгүҥҥү күн туругунан, 13 сайабылыанньа киирэн турар, итинтэн биир устудьуон босхоҕо көһөрүн туһунан быһаарыы ылыллыбыта.

Ыйытыы: Хомуурга ыҥырыынан сибээстээн, кэлин элбэх оҕо үөрэххэ киирдэ, онно бэрэбиэркэ барар диэн иһиллэр.

Хоруй: Эппитим курдук, биһиэхэ суһал ыстаап үлэлии олорор. Дьуһуурустубалыыбыт, военкоматтары, идэҕэ бэлэмниир үөрэх тэрилтэлэрин кытта ыска ситимнээхтик үлэлиибит. Билиҥҥитэ оннук көстүү тахса илик, боппуруоһу барытын көрөн, хабан олоробут.

Ыйытыы: Оҕолор сынньалаҥнарын туһунан сиһилии быһаарыаҥ буолаарай.

Хоруй: Оҕо сынньалаҥар сыһыаннаах икки ыйаах баар. Биирдэрэ бу сыл балаҕан ыйынааҕы, иккис ыйаахха олоҕуран, олунньу ыйтан командировкаҕа барбыт дьон оҕолоро эмиэ туһанар кыахтаахтар. Өскөтүн, сайын туһаммыт түгэннэригэр путевкатын төлүөхпүтүн сөп. Туһамматахтарга саҥа сылга диэри “Сосновый бор” (Дьокуускай) оҕо сынньалаҥын киинигэр симиэнэлэргэ путевкалары биэриэхпитин сөп. Муниципальнай тэриллиилэргэ киирбит сайабылыанньаларынан тустаах миэрэнэн эһиил сайын бэйэлэрин (улуустааҕы) лааҕырдарыгар эмиэ туттар бырааптаахтар. Холобур, сорохтор эһиилги бастакы сезоҥҥа, атыттар үһүс сезоҥҥа диэн сайабылыанньаларыгар ыйаллар. Эһиил сайын сынньаныахтара диэн быйылгыттан аккаастанар дьон эмиэ бааллар. Булгуччу билигин туһаныахтаахтар диэн буолбатах.

Ыйытыы: Элимиэн төлүүр аҕа хомуурга ыҥырыллыбыт түгэнигэр, кэргэниттэн арахсыбыт буоллаҕына туох көмө көрүллэрий? Иккис кэргэниттэн оҕолоро бары миэрэлэри туһанан олорор түгэннэригэр.

Хоруй: СӨ Үлэҕэ уонна социальнай харысхал министиэристибэтин кытта ыкса ситимнээхтик үлэлэһэ олоробут. Хомуурга ыҥырыллыбыты кытта сайабылыанньа биэрээччи аймахтыы буолууларын тустаах министиэристибэ быһаарар. Кинилэр военкоматы кытта быһачча сибээстэһэллэр. Балаһыанньа араас буолуон сөп. Оҕо сибэдиэтэлистибэтигэр аҕатын аатыгар хомуурга ыҥырыллыбыт киһи ыйылла сылдьар буоллаҕына, бу оҕолор биэс миэрэттэн хабыллар миэрэлэринэн барытынан хааччыллыахтаахтар. Төрөппүт биһиэхэ биллэриэн, судаарыстыбаннай өҥө (госуслуги) порталын нөҥүө эбэтэр МФЦ тиийэн (принцип единого окна) сайабылыанньатын толорон ыытара ирдэнэр.