«Үөрэх» национальнай бырайыагынан успуорт саалалара саҥардылыннылар

Саха сирин  52 оскуолатын 14 тыһ. кэриҥэ үөрэнээччитэ быйыл саҥа тэриллээх өрөмүөннэммит успуорт саалаларыгар дьарыктанар кыахтаннылар. 

Оттон бу биэс сыл устатыгар  «Хас биирдии оҕо ситиһиитэ» диэн бэрэсидьиэн бырайыагынан, уопсайа 232 үөрэх кыһатыгар успуордунан дьарыктанарга материальнай-тэхиньиичэскэй баазалара саҥардыллыбыта бэлиэтэнэр.

«Хас биирдии оҕо ситиһиитэ» диэн федеральнай бырайыак оҕо уонна ыччат дьоҕурун, талаанын арыйарга, сайыннарарга аналлаах, ол иһигэр успуорт эйгэтигэр. Тэрээһиннэр 2019 сыллаахха Арассыыйа Бэрэсидьиэнэ Владимир Путин көҕүлээбит «Үөрэх» национальнай бырайыагын сорҕотунан буолаллар. Маныаха үүнэр көлүөнэ успуордунан дьарыктанарыгар тирэх баар буолуохтаах диэн бэлиэтиир Ил Дархан Айсен Николаев. Оттон оскуолаларга успуорт саалаларын тупсарыы, саҥардан биэрии үлэлэрэ ыытыллыбыттара сиэксийэлэргэ уонна кулууптарга оҕолору тардар, угуйар.

Үөрэх дьыла саҕаланарыгар түөрт кыһаҕа тэҥинэн өрөмүөн түмүктэммитэ. Бу Алдан оройуонугар Томмокко 8 №-дээх оскуола, Бүлүү улууһугар Халбаакыга, Өлүөхүмэҕэ 2 №-дээх оскуола уонна Уус Алдаҥҥа Тулунаҕа.

Уопсайа 11  оскуола өрөмүөннэммитэ, успуорт малынан-салынан, тэрилинэн хааччыллыбыта. Ол курдук, Жатайга 2 №-дээх, Мииринэйгэ 26 №-дээх, Алдаҥҥа 2 №-дээх оскуолалар, Сунтаарга Шеяҕа, Балыктаахха, Майа киэһээҥҥи, Мэҥэ Хаҥалас улууһун Аллараа Бэстээх 1 №-дээх, Ньурба Акана, Уус Маайа Солнечнай оскуолалара, Нам улууһунааҕы үөрэх киинэ, Хаҥаласка Покровскай 3 №-дээх кыһата буолаллар. Маны сэргэ, Чурапчы улууһугар Төлөйгө аудитория успуорт саалатыгар уларытыллыбыта. Өссө 36  үөрэх кыһатыгар успуорт кулууптарын тэрийэргэ уонна сайыннарарга мал-сал ылыллыбыта.

СӨ Үөрэх уонна наука министиэристибэтэ бэлиэтээбитинэн, «Хас биирдии оҕо ситиһиитэ» бырайыак иитинэн, туох баар өрөмүөн, спортивнай малы-салы тиэрдии уонна туруоруу болдьоммут кэмигэр, атырдьах ыйын 25 күнүгэр диэри, барыта толоруллубут.

Маны тэҥинэн, быйыл сыл бүтүөр диэри бары өттүнэн табыгастаах успуорт модульнай саалалара Дьокуускай куорат 10 уонна 20 №-дээх оскуолаларыгар киирэллэрэ былааннанар. Маннык модульнай сааланы Ил Дархан «2030 сылга диэри СӨ Алдан оройуонун сайдыыта» ыйааҕын толоруу иитинэн, Алдан гимназиятыгар сыл бүтүөр диэри тутуохтаахтар.

Уопсайа биэс, 2019-2023 сылларга, Саха сиригэр национальнай бырайыак суотугар 232 үөрэх кыһатыгар өрөмүөннэр ыытыллыбыттар уонна успуорт малынан-салынан саалалар хааччыллыбыттар.

2024 сылга «Хас биирдии оҕо ситиһиитэ» бырайыак тэрээһиннэринэн өрөспүүбүлүкэ 52 оскуолата хабыллыа, итинтэн биэһигэр успуорт саалаларга хапытаалынай өрөмүөннэр ыытыллыахтара. Ити курдук оҕолор физкултууранан уонна успуордунан дьарыктаналларыгар, уопсайа 284 кыһаҕа усулуобуйа тупсарыллыа. Бу Саха сиригэр успуордунан дьарыктанар оҕо ахсаанын элбэтиэ, эһиил успуордунан дьарыктанааччы 80%, 2030 сылга 90% диэри улаатыа.

СӨ Ил Дарханын уонна Бырабыыталыстыбатын пресс-сулууспата