Үөрэх систиэмэтин үлэһиттэрин үлэҕэ бырааптарын уонна социальнай мэктиэлэрин боппуруостарын ырытыстылар

Үөрэх уонна билим миниистирэ Нюргуна Соколова өрөспүүбүлүкэ Идэлээх сойууһун федерациятын бэрэссэдэтэлэ Николай Дегтяревы уонна үөрэх үлэһиттэрин идэлээх сойууһун өрөспүүбүлүкэтээҕи кэмитиэтин бэрэссэдээтэлэ Янина Щепинскаяны кытта оробуочай көрсүһүүнү тэрийдэ.  Тэрээһин иитинэн үөрэх систиэмэтин үлэһиттэрин үлэҕэ бырааптарын уонна социальнай мэктиэлэрин боппуруоһун ырытыстылар.

Кэпсэтии сүрүн тиэмэтинэн өрөспүүбүлүкэ үөрэҕин тэрилтэлэригэр ыстаат модельнай наардалын (модельное штатное расписание) киллэрии буолла. Федеральнай нуорма сэбиэскэй кэмтэн аан бастакытын уларыйбытын бэлиэтээтилэр. Онно олоҕуран, министиэристибэ эрэгийиэннээҕи уратыны учуоттаан өрөспүүбүлүкэтээҕи ыстаат модельнай наардалын анаалыстыыр үлэни ыытар.

Министиэристибэ, күн бүгүн улуустары кытта сүбэ-ама барарын иһитиннэрдэ. Хас биирдии үөрэх тэрилтэтэ биирдиилээн көрүллэр. Эрэгийиэннээҕи ыстаат модельнай наардалын түһүмэҕинэн кэлэр сыл устата киллэрэр былааннаахтар.

Итини тэҥэ, көрсүһүүгэ эдэр исписэлиистэри өйөөһүн уонна аҕа сүбэһиттэргэ эбии төлөбүрү киллэрии боппуруостарын көрдүлэр.

Кэпсэтии түмүгүнэн, министиэристибэ уонна Өрөспүүбүлүкэтээҕи идэлээх сойуус федерацията педагогическай үлэһиттэр хамнастарын төлөбүрүн эйгэтигэр уларытыылары учуоттаан, сөбүлэҥи саҥардан биэрэргэ сүбэлэстилэр.

Бу туһунан Үөрэх уонна билим министиэристибэтин пресс-сулууспата суруйар.