Үөрэх тэрилтэлэрэ бүгүҥҥүттэн докумуоннары туталлар

Бүгүҥҥүттэн үрдүк, орто үөрэх тэрилтэлэрэ 2023-2024 үөрэх дьылыгар докумуоннары тутан саҕалаатылар. Сайабылыанньалары үөрэх кыһатыгар бэйэтигэр кэлэн эбэтэр онлайн ыытыахха сөп, сорохтор буостанан эмиэ ылаллар.

Быйыл үрдүк үөрэххэ туттарсыыга кэккэ уларыйыылар киирбиттэрэ. Ол курдук, бастакытынан, абитуриент биир сайабылыанньаҕа хас даҕаны хайысханы ыйар буолла уонна бэйэлэригэр ордук суолталаахтарынан (порядок приоритетов) көрөн нүөмэрдэри туруорар. Бакалавриат уонна специалитет бырагыраамаларыгар туттарсааччылар биэс хайысханы талар кыахтаахтар. Балары суолталарынан бииртэн биэскэ диэри нүөмэрдииллэр. Нүөмэрдэрин от ыйын 25 күнүгэр диэри уларытар бырааптаахтар.

Иккиһинэн, байыаннай эпэрээссийэҕэ кыттар дьон оҕолоругар итиэннэ Арассыыйа дьоруойа, Хорсун быһыытын иһин үс уордьанынан наҕараадаламмыт байыаннай сулууспалаахтарга туспа кубуота (отдельная квота) көрүллэр. Маныаха анаан бүддьүөт уопсай миэстэтиттэн 10 бырыһыантан итэҕэһэ суох миэстэ көрүллэр. Үөрэххэ туттарсааччы маны бигэргэтэр туһааннаах ыспыраапканы аҕалара ирдэнэр.

Аны үөрэххэ туттарсааччылар биир кэлим эксээмэни таһынан эбии тургутуулары (вступительные испытания) туттараллар. Ханнык идэлэргэ тургутуулар баалларын билэллэрэ наада. Ол инниттэн туттарсар үөрэхтэрин тэрилтэлэрин саайтарыгар киирэн үөрэххэ ылыы быраабылаларын билсэллэрэ булгуччу ирдэнэр. Холобур, эбии тургутуулар успуорт, суруналыыстыка, архитектура, о.д.а. идэлэргэ бааллар. Ону таһынан, орто анал үөрэх кэнниттэн үрдүк үөрэххэ киирээччилэр үрдүк үөрэх бэйэтин эксээмэнин ааһаллар.

Манна даҕатан эттэххэ, Саха сиригэр 5 федеральнай (М.К. Аммосов аатынан Хотугулуу-Илиҥҥи федеральнай университет, Арктикатааҕы судаарыстыбаннай агротехнологическай университет, Арктикатааҕы судаарыстыбаннай култуура уонна искусство института, Чурапчытааҕы физическэй култуура уонна успуорт института, Дьокуускайдааҕы уу тырааныспарын института), 1 эрэгийиэннээҕи (В.А. Босиков аатынан СӨ Муусука үрдүкү оскуолата (институт)) итиэннэ 42 орто анал үөрэх тэрилтэтэ бааллар.