Үөрэх уонна билим миниистирэ Өлүөхүмэ улууһугар үлэлээтэ

Өлүөхүмэ улууһугар оробуочай сырыытын иитинэн СӨ үөрэҕин уонна билимин миниистирэ Ирина Любимова Үөрэнээччилэр айар дьоҕурдарын сайыннарар уонна гуманитарнай үөрэх киинигэр сырытта.

Ирина Павловнаны улуус баһылыгын социальнай боппуруостарга солбуйааччы Оксана Саввинова, үөрэх управлениетын начаалынньыга Андрей Солдатов уонна начаалынньыгы солбуйааччы Туйаара Карташова арыаллаатылар.

Ыалдьыттарга оҕолор робототехникаҕа уонна 3Д моделированиеҕа үлэлэрин быыстапкатын, үөрэнээччилэр чинчийэр үлэлэрин хомуурунньугун, тустаах киин үлэтин естественнэй-научнай хайысхатын приборунан хааччыллыытын көрдөрдүлэр. Бу туһунан СӨ Үөрэҕин уонна билимин министиэристибэтин саайтыгар суруллар.

Дириэктэр Ольга Рожкова тустаах киин эбии уонна уопсай үөрэхтээһини дьүөрэлээһин иитинэн көҕүлээн олоххо киллэрбит, оскуолаларга үлэлии турар “Көдьүүстээх оскуола” өрөспүүбүлүкэтээҕи бырайыакка тохтоото. Бу «Научное лето онлайн», «История Алсиб – история моей страны», «Трансформация предметной области технология для учащихся основной школы» бырайыактар буолаллар.  «Научное лето онлайн» бырайыак өрөспүүбүлүкэҕэ үс сыл ыытылынна, бу сылларга 26 улуустан тыһыынчаттан тахса улахан дьон уонна оҕолор кытыннылар. Бырайыак сүрүн соруга – оскуола үөрэнээччилэринэн Саха сирин айылҕатын суруйтарыы. Тэрийээччилэр уонна бииргэ үлэлэһэр тэрилтэлэр – СӨ Билим дьоҕус академията, Өлүөхүмэ улууһун Үөрэнээччилэр айар дьоҕурдарын сайыннарар уонна гуманитарнай үөрэх киинэ, Үүнэр көлүөнэ пуондатын өйөбүлүнэн билим институттара. Былырыын бырайыак В.И. Вернадскай аатынан национальнай бириэмийэ  «Просвещение, как путь к устойчивому развитию» номинациятын лауреатынан буолбута.

Миниистир киин үлэтин билсэн баран, кэлэктиип бэйэтин уопутун өрөспүүбүлүкэ үөрэҕин эйгэтигэр киэҥник тарҕатарыгар сүбэлээтэ.

Салгыы Ирина Павловна А.Г.Кудрин аатынан Абаҕа орто оскуолатыгар сырытта. Манна миниистири сахалыы сиэринэн арыылаах алаадьылаах көрүстүлэр, оскуола, пресс-сулууспатын уонна түмэл үлэтин-хамнаһын билиһиннэрдилэр.

Абаҕа нэһилиэгин кэнниттэн Ирина Любимова быйыл сайын спортивнай саалата өрөмүөннэниэхтээх 2-с нүөмэрдээх оскуолаҕа сырытта. Ону таһынан, оскуолаҕа “Үүнүү туочукатын” уонна медиа-киин үлэтин көрдөрдүлэр. Миниистир Өлүөхүмэ улууһугар оскуолаларга пресс-сулууспа үлэлэрэ күүскэ сайдыбыттарын бэлиэтиир.

Бу кэнниттэн миниистир Өлүөхүмэтээҕи тиэхиньикумҥа иитэр үлэҕэ уонна оҕо уопсастыбаннай тэрилтэлэрин кытта үлэлэһэр дириэктэр сүбэһиттэрин итиэннэ улуус үөрэҕин тэрилтэлэрин салайааччыларын кытта көрүстэ. Көрсүһүүгэ СӨ Бырабыыталыстыбатын бэрэссэдээтэлэ А.В. Тарасенко, «Сахатранснефтегаз» генеральнай дириэктэрэ А.В. Колодезников, норуот дьокутаата Н.И. Кульбертинов, улуус баһылыга Н.Н. Харбин, улуустааҕы үөрэх управлениетын начаалынньыга А.В. Солдатов кытыннылар.

Сүбэһиттэр Никифорова Т.В. (Солянка оскуолата), Кипкеева С.А. (2-с нүөмэрдээх оскуола) уонна Мусаева Э.М. (4-с нүөмэрдээх оскуола) сүбэһиттэр үлэлэрин чэрчитинэн олоххо киирэр бырайыактарынан иһитиннэрии оҥордулар. Көрсүһүү түмүгэр салайааччылар, сүбэһиттэр, үөрэнээччилэр тутаах боппуруостарын биэрэн хоруй ыллылар.

И.П.Любимова үөрэх тэрилтэлэринэн сырыытын кэнниттэн Олоҥхо ыһыаҕа ыытыллыбыт, Өлүөхүмэ улууһун айылҕата уонна Өлүөнэ өрүс ытыска уурбуттуу көстөр аатырбыт Аанньаах Хочотун көрдүлэр.