Үөрэх уонна билим миниистирэ Нюргуна Соколова министиэристибэ ааспыт сыллааҕы үлэтин отчуоттаата

Бу күннэргэ үөрэх үлэһиттэрин тохсунньутааҕы мунньаҕа киэҥ бырагыраамалаах ыытылла турар. Бүгүн Үөрэх уонна билим миниистирэ Нюргуна Соколова министиэристибэ ааспыт сыллааҕы үлэтин отчуоттаата.

Тэрээһиҥҥэ улуустааҕы, куорат үөрэҕин управлениетын, министиэристибэ биэдэмэстибэннэй тэрилтэлэрин салайааччылара, ыҥырыылаах ыалдьыттар, уоспастыбаннай тэрилтэлэр, бииргэ үлэлэһэр тэрилтэлэрин бэрэстэбиитэллэрэ кытыннылар.

Миниистир оскуола иннинээҕи үөрэхтээһинтэн саҕалаан үрдүк үөрэххэ тиийэ сыллааҕы үлэ түмүгүн таһаарда уонна кэлэр сыллааҕы соруктары туруорда. Ааспыт сыл дойду бэрэсидьиэнэ Владимир Путин биллэрбит Педагог уонна уһуйааччы сылыгар ананан ыытылынна. Өрөспүүбүлүкэ үрдүнэн бу сыл иитинэн 2000 кэриҥэ тэрээһин ыытыллыбыт, бары педагогтар, ону таһынан, устудьуоннар, үөрэнээччилэр хабыллыбыттар.

“2023 сылга Ил Дархан ыйааҕынан аан бастакытын 36 уһуйааччы-педагогу көҕүлүүр 100 тыһ. солк. суумалаах бириэмийэ көрүлүннэ. Иккис сылын уһуйаан, оскуола, эбии үөрэхтээһин, орто анал үөрэхтээһин 100 педагогугар бириэмийэ туттарылынна.

Өрөспүүбүлүкэ Бырабыыталыстыбата аан маҥнайгытын эдэр педагогтары көҕүлүүр туһугар өйүүр төлөбүрү, үлэлии барар сирдэригэр диэри айаннарын, таһаҕастарын төлөбүрүн көрдө. Маны таһынан, 11 педагог улууска олорор усулуобуйатын тупсарынар кыахтанна”, — диэн миниистир эттэ.

Былырыын үөрэх үлэһиттэригэр аналлаах 22 куонкурус ыытыллыбыт.

Үүммүт сыл Ил Дархан Айсен Николаев ыйааҕынан Оҕо саас сылыгар ананна. “Сүрүн координаторынан Үөрэх уонна билим министиэристибэтэ буолар, араас тэрээһиннэр ыытыллыахтара, номнуо саҕаланнылар. Манна оҕолорбут доруобуйаларын, эттэрин-хааннарын чэбдигирдии, култуураҕа тэрээһиннэр, уопсайынан, оҕолор эргиччи сайдыылара хабыллар. Айсен Сергеевич сүрүн миэрэлэри номнуо ыйбыта. Бу 20 тыһ. солк. суумалаах бастакы идэни ылыыга сэртипикээт, кэллиэскэ, тиэхиньикумҥа туттарсар элбэх оҕолоох ыал оскуоланы бүтэрэр оҕотугар 50 тыһ. солк. суумалаах сэртипикээт көрүллэр. Ону таһынан, 7-13 саастаах оҕолору барыларын “Карта юного жителя” каартанан эбии үөрэхтээһининэн, култуура, успуорт тэрээһиннэринэн хабыахтаахпыт. Мэхэниисимин оҥоро сылдьабыт, быйыл ситиһиилээхик олоххо киллэриэхпит”, — диэн иһитиннэрдэ.

Миниистир сүрүн дакылаатыгар уһуйаан, оскуола, орто үөрэх, үрдүк үөрэх, эбии үөрэхтээһин эйгэлэрин  барытын хабан толору, «эттээх» дакылааты оҥордо. Дакылаат кэнниттэн миниистир ыйытыыларга хоруйдаата, этиилэри иһиттэ.