Үөрэх үлэһиттэрэ Атырдьах ыйынааҕы сүбэ мунньахха муһуннулар

Атырдьах ыйын 21-23 күннэригэр Саха сирин үөрэх үлэһиттэрин үгэскэ кубулуйбут Атырдьах ыйынааҕы мунньаҕа буола турар.

Быйылгы тэрээһин «Воспитание личности в едином образовательном пространстве» диэн сүрүн тиэмэнэн ыытыллар. Педагогтары кытта пленарнай мунньахха Ил Дархан Айсен Николаев өрөспүүбүлүкэ үөрэҕин биир кэлим тиһигин 2030 сылга диэри сайыннарыы үлэтэ ыытылларын бэлиэтээтэ.

«Сыл анараа өттүгэр Атырдьах ыйынааҕы сүбэ мунньахха үөрэх эйгэтигэр туох уларыйыы киирэрин туһунан билиһиннэрбитим уонна Саха сиригэр үөрэх биир кэлим тиһигин сайыннарыы туһунан Ыйаахха илии баттаабытым. Бастатан туран, оҕо уһуйаана уонна оскуола, кэллиэстэр уонна үрдүк үөрэх кыһалара үөрэх ситимиттэн тус туһунан үлэлииллэриттэн аккаастаныахтаахпыт. Үөрэх — экэниэмикэ үүнүүтүн уонна дьон олоҕун тупсарар инвестициялааһын биир өрүтүнэн буолар дии саныыбын. Онуоха биһиги элбэх национальностаах өрөспүүбүлүкэбит үөрэҕин тиһигэ уратылааҕын өйдөөн, аныгы ыҥырыыга эппиэттиир саҥа ньымалары киллэрэрбит улахан суолталаах», — диэн Айсен Николаев эттэ.

Айсен Николаев маны сэргэ Саха сиригэр үөрэх инфраструктуратын тупсарыыга улахан хардыы оҥоһуллубутун бэлиэтээтэ. 2018 сылтан сэттэ тыһыынча миэстэлээх 55 саҥа оҕо уһуйаана уонна 12 тыһыынча миэстэлээх 57 оскуола тутуллубута. Бу сыл бүтүөр диэри өссө 13 оскуола уонна 4 оҕо уһуйаана тутуута түмүктэниэхтээх. 2025 сылга саҥа 12 оскуола уонна 4 оҕо уһуйаана үлэҕэ киирэрэ былааннанар, ону таһынан төгүрүк сыл устата үлэлиир «Хотугу сулус» оҕо киинэ.

Атырдьах ыйынааҕы сүбэ мунньах чэрчитинэн төгүрүк остуоллар, сэминээрдэр, стратегическай сиэссийэлэр, үөрэх интенсивтара, мастарыскыайдар, панельнай дьүүллэһиилэр ыытыллаллар. Учууталлар бу пуорум профессиональнай дьоҕурдарын сайыннарыыга улахан суолталааҕын бэлиэтииллэр. Саха сирин араас оройуоннарыттан учууталлар уопут атастаһаллар.