Саха сирин учууталларын, педагогическай уопсастыбаннаһын XIV сийиэһин улахан мунньаҕар, тыйаатыр үрдүк түрүбүнэтигэр туран оҕону иитиигэ-үөрэтиигэ сүҥкэн кылааттарын киллэрбит педагогтарга СӨ судаарыстыбаннай наҕараадаларын туттардылар.
Ол курдук, СӨ Ил Дарханын ыйааҕынан, үөрэх сайдыытыгар, учуутал идэтэ уонна аптарытыата үрдүүрүгэр сүҥкэн кылаатын итиэннэ үгүс сыллаах ситиһиилээх, айымньылаах үлэтин иһин, “СӨ норуотун учуутала” бочуоттаах ааты педагогическай үлэ бэтэрээнигэр, РСФСР оскуолаларын үтүөлээх учууталыгар, Чурапчы улууһун бочуоттаах олохтооҕор Чечебутов Дмитрий Павловичка иҥэрдилэр.
Физикаҕа Бүтүн Арассыыйатааҕы олимпиадаларга призердары, үөрэххэ үрдүк көрдөрүүлээх оҕолору иитиигэ тус кылаатын, учууталлар уонна төрөппүт уопсастыбаннаһа билиниитин иһин, педагогика эйгэтигэр М.А.Алексеев аатынан СӨ судаарыстыбаннай бириэмийэтин Дьокуускай куорат 12-с нүөмэрдээх оскуолатын физикаҕа учууталыгар, СӨ үөрэҕин туйгунугар Мярикянов Эрнест Трофимовичка туттардылар.
СӨ экстрапирамиднай кэһиллиилэргэ эпидемиологическай уонна клинико-генетическэй характеристиканы оҥоруу иһин, эдэр учуонайдарга уонна исписэлиистэргэ билим уонна тиэхиньикэ эйгэтигэр В.П.Ларионов аатынан судаарыстыбаннай бириэмийэни ХИФУ мэдиссиинэҕэ институтун неврологияҕа уонна психиатрияҕа хаапыдыратын дассыаныгар Таппахов Алексей Алексеевичка туттардылар.
Үөрэх уонна иитии эйгэтигэр үтүөлэрин, өрөспүүблүкэ социальнай-экэнэмиическэй сайдыытыгар кылааттарын, үгүс сыллаах таһаарыылаах үлэлэрин иһин “СӨ үтүөлээх учуутала” бочуоттаах ааты Ленскэй оройуонун Витим оскуолатын алын кылааһын учууталыгар Красильникова Нина Фридриховнаҕа, Алдан оройуонун Томмот куорат 6-с нүөмэрдээх оскуолатын алын кылаһын учууталыгар Молдуянова Надежда Анатольевнаҕа, Уус Алдан улууһун Майаҕас оскуолатын химияҕа учууталыгар Павлова Татьяна Гаврильевнаҕа, “СӨ үөрэҕин үтүөлээх үлэһитэ” ааты Өлүөхүмэ улууһун Тээнэ оскуолатын дириэктэригэр Баишева Изольда Павловнаҕа иҥэрдилэр.
СӨ Ил Дарханын кыраамататынан Дьокуускай куорат 7-с нүөмэрдээх “Остров сокровищ” оҕону сайыннарар киин-уһуйаан сэбиэдиссэйэ Кириллина Майя Петровна, “Гражданскай килбиэн” ураты бэлиэнэн Алданнааҕы мэдиссиинэ кэллиэһин преподавателэ Вахнин Михаил Васильевич, Кангалас оскуолатын (Дьокуускай куорат) технологияҕа учуутала Кладков Анатолий Михайлович наҕараадаланнылар.
Саха АССР тэриллибитэ 100 сылыгар, Саха сирин Сырдатыыга министиэристибэтин үбүлүөйдээх 100 сылыгар, Учууталлар, педагогическай уопсастыбаннас сийиэһин кэмигэр бу курдук судаарыстыбаннай наҕараадалары тутар икки бүк үөрүүлээх. Эҕэрдэлиибит!
Хаартыска: Андрей СОРОКИН (СИА).
Оройуоннааҕы борокуратууралар ирдэбиллэринэн, Саха сиригэр элбэх кыбартыыралаах дьиэлэргэ эрэгийиэн операторыгар өрөмүөн үлэтин ыытарга эбээһинэстиир туһунан…
Бүгүн Байыаннай дьайыы бэтэрээннэрин күнэ. Саха сирин улуустарыгар бу бэлиэ күнүнэн араас сылларга байыаннай дьайыыларга,…
Дьокуускайга тутулла турар Арктикатааҕы эпос, ускуустуба киинэ Саха сиригэр баар Олоҥхо дьиэлэрин сүрүннүүр киин буолуоҕа. …
От ыйа сайын үгэнэ, сайын оройо. Аан Алахчын хотун Ийэбит ыйа хайдах буолуой? Бэс ыйын…
Удачнай куорат борокуратуурата анаммыт накаастабыл кээмэйэ кыратынан сибээстээн, суут уурааҕын апелляция бэрээдэгинэн үҥүстэ. Ол уурааҕынан,…
Бүгүн Оһуокайбыт түһүлгэтигэр субуотунньуктаатыбыт. Мустуубут боппуруоһунан түмсүү сэбиэтэ Оһуокай ыһыаҕын тэрийиигэ сүбэлэстибит. Бастатан туран, Нерюнгрига…