Үөрэх үлэһиттэрин Атырдьах ыйынааҕы сүрүн  мунньаҕа буолла

Саха сирин үөрэҕин үлэһиттэрин Атырдьах ыйынааҕы тэрээһинин сүрүн мунньаҕа бүгүн Д.К.Сивцев-Суорун Омоллоон аатынан опера уонна балет тыйаатырыгар буолла.

Сүрүн мунньахха Ил Дархан Айсен Николаев, Ил Түмэн бэрэссэдээтэлин солбуйааччы Александр Жирков, Бырабыыталыстыба бэрэссэдээтэлин солбуйааччы Анатолий Семенов, Үөрэх уонна билим миниистирэ Нюргуна Соколова, Арассыыйа дьоруойа Игорь Юргин, үөрэх управлениеларын, тэрилтэлэрин салайааччылара, педагогтар, педагогическай уопсастыбаннас кытыннылар.

Ил Дархан Айсен Николаев тыла этэригэр: “Өрөспүүбүлүкэ үөрэҕин систиэмэтэ уһуйаантан университекка тиийэ биир санаалаах, көрүүлээх үлэлиэхтээх. Бу улахан суолталаах. Биһиги Саха сирин экэниэмикэтин таҥарбыт, өрөспүүбүлүкэҕэ олох хаачыстыбатыгар үрдүк соругу, ситиһиини туруорарбыт быһыытынан, экэнимикэ өрө тахсыытын быһаарар биир суолталаах инвестиционнай инструмент быһыытынан көрүөхтээхпит, ол аата дьон үтүө туруктаныытын эмиэ” – диэн эттэ.

Саҥа суоллары көрдүүрбүтүгэр үгэстэри урусхаллаабакка, педагогтар көлүөнэлэр тухары илдьэ кэлбит нэһилиэстибэлэриттэн аккаастаммакка, төттөрүтүн, баары сыаналаан, өрө тутан аныгы кэмҥэ эппиэттиир саҥа инструменнары, көрүүлэри киллэриэхтээхпит диэн ыйда.

Национальнай бырайыактар, Уһук Илини сайыннарыы бырагыраамата баар буолан, Саха сиригэр киэҥ хардыы оҥоһуллубутун, бу курдук далааһыннаах тутуу өссө бара илигин эттэ. 2018 сылтан өрөспүүбүлүкэҕэ 460-тан тахса араас көрүҥнээх оҕону сайыннарар киин аһыллыбыт. 7 тыһ. миэстэлээх 55 уһуйаан, 12 тыһ. үөрэнэр миэстэлээх 57 оскуола тутуллубут. Уонунан сыллар тухары аан маҥнайгытын 95 үөрэх эбийиэгэр хапытаалынай өрөмүөн барбыт, 25 кэллиэһи саҥардыы саҕаламмыт. Быйылгы сыл түмүктэниэр диэри  өссө 13 оскуола уонна 4 уһуйаан тутуллан үлэҕэ киириэхтээх. Эһиил 12 оскуола, 4 уһуйаан тутуута уонна күүтүүлээх-кэтэһиилээх сылы эргиччи үлэлиир “Хотугу сулус” оҕо киинэ тутуллан бүтэллэрэ былааннанар.

“Биллэн турар, материальнай усулуобуйа тупсуутунан үөрэх хаачыстыбата үрдүүрүн кэтэһии оруннаах” – диэн эттэ итиэннэ биирдиилээн түмүктэргэ, холобурда тохтоон ааста.

Үөрэххэ уларытыы сүрүн кыттааччыта, хамсатааччыта – педагога суох сыҕарыйбатын, тахсыбатын ыйда. Бырабыыталыстыбаҕа туһаайан кэлэр сылга диэри үөрэх эйгэтигэр квалификацияны үрдэтии үбүлээһинин мэхэниисимин хаттаан көрөргө уонна көдьүүстээх, персонализированнай этиини киллэрэллэригэр сорудахтаата.

Оттон үүнэр ыччаты иитии туһунан этэригэр: “Эдэр көлүөнэни патриотическай тыыҥҥа иитиигэ өрүү биһиги кэммит дьоруойдара кыттыахтаахтар, алтыһыахтаахтар” – диэн бэлиэтээтэ.

“Бырабыыталыстыба, Үөрэх уонна билим министиэристибэтэ быһаарыы ылынаргытыгар дьон, уопсастыбаннай холбоһуктар, үөрэх тэрилтэлэрин уонна муниципалитеттар этиилэрин барытын түмүҥ. Бу быһаарыылар үөрэх биир систиэмэтэ саҥардылларыгар улахан тутулунан, технология сайдыытын тирэҕинэн уонна Саха сирин дьонун олоҕун хаачыстыбата тупсарыгар төрүөтүнэн буолалларыгар көмөлөһүөхтэрэ” – диэн Ил Дархан түмүктээн эттэ.