Үөрэх үлэһиттэрин мунньаҕа буолар

Өрөспүүбүлүкэ үөрэҕин үлэһиттэрин үгэскэ кубулуйбут Тохсунньутааҕы мунньаҕа бу ый 30-31 күннэригэр былааннанар.

Бастакы күн СӨ Үөрэҕин уонна билимин миниистирэ Ирина Любимова 2022 сыллааҕы аһаҕас отчуота буолуоҕа. Бу күн “Арассыыйа учууталларынан сураҕырар” диэн Уһуйааччы сылын аһыллыытын үөрүүлээх тэрээһинэ былааннанар. Тохсунньутааҕы мунньах иитинэн үөрэх хаачыстыбатыгар туһаайыллыбыт хайысхаларынан мунньахтар тэриллиэхтэрэ: үөрэнээччилэри бэлэмниир хаачыстыбаны сыаналааһын систиэмэтэ; намыһах көрдөрүүлээх уонна (эбэтэр) табыгаһа суох услуобуйаҕа үлэлиир оскуолалар үлэлэрин систиэмэтэ; оҕо уонна ыччат кыаҕын, талаанын өйөөһүн уонна булан сайыннарыы систиэмэтэ; оскуола иннинээҕи үөрэхтээһин хаачыстыбатын кэтээн көрүү уонна үөрэх тэрилтэлэрин салайааччыларын көдьүүһүн систиэмэтэ, уо.д.а.

“Профессионалитет” федеральнай бырайыак иитинэн Дьокуускайдааҕы тыа хаһаайыстыбатын тиэхиньикумун үөрэтэр-быыстапкалыыр киинэ аһыллыаҕа. “Орто анал үөрэх аспираннарын оскуолата” стратегическай сиэссийэ буолуоҕа, өрөспүүбүлүкэ орто үөрэҕин тэрилтэлэрин салайааччыларыгар уонна педагогическай үлэһиттэргэ тэрээһиннэр былааннаналлар.

Тохсунньутааҕы мунньахха судаарыстыбаннай былаас уорганын бэрэстэбиитэллэрэ, үөрэх, билим үлэһиттэрэ, иитээччилэр, төрөппүттэр, уопсастыбаннай тэрилтэлэр кыттыахтара.

Тохсунньутааҕы мунньах бырагырааматын манна көр.