Үөрэххэ туттарсыы түмүктэнэрэ бу кэллэ

От ыйын 25 күнүгэр үрдүк үөрэх кыһаларын төлөбүрэ суох миэстэлэригэр  докумуоннары ылыы бүтэр. Онон Хотугулуу-Илиҥҥи федеральнай университекка абитуриеннар тиэтэйэ-саарайа бүтэһик докумуоннарын туттараллар, чуолкайдаһаллар.

Быйыл университекка орто үөрэхтэн саҕалаан аспирантураҕа, ординатураҕа  тиийэ 4136 төлөбүрэ суох миэстэ көрүллүбүт.

Тутар хамыыһыйа салайааччытын солбуйааччыта Петр Кычкин этэринэн, от ыйын 23 күнүнээҕи туругунан 6200-тэн тахса абитуриентан 19763 сайабылыанньа киирдэ.

“Өйүүн, от ыйын 25 күнүгэр, БКЭ түмүгүнэн бүддьүөт миэстэтигэр туттарсар абитуриеннартан докумуоннары ылан бүтэбит, — диир Петр Петрович. — 3056 миэстэҕэ. Дьэ ол кэнниттэн саамай кэтэһиилээх кэм саҕаланар – киирдим дуу, суох дуу диэн. Ол кэм түһүмэхтэргэ арахсар. Бастакы “приоритет” дэнэр түһүмэххэ Бүтүн Арассыыйатааҕы олимпиадаларга ситиһиилээхтик кыттыбыт оҕолору куонкуруһу таһынан ылабыт. Оттон квотанан киирээччилэр бараллар: тус сыаллаах, тулаайах, инбэлиит, байыаннай дьайыы кыттыылаахтарын оҕолоро, онно кыттыбыт дьон. Бу түһүмэххэ баар туттарсааччы ахсаана 1000-тан тахсалар. Оттон уопсай туттарсар оҕолор киирбиттэрэ-киирбэтэхтэрэ атырдьах ыйын 4-9 күннэригэр биллиэҕэ.

Абитуриеннар саамай ыйытар ыйытыылара, хаһааҥҥа диэри докумуон оригиналын тутаҕыт диэн. Бастакы түһүмэххэ киирбиттэртэн докумуоннарын — аттестаты уонна диплому — от ыйын 28 күнүгэр киэһэ 18.00 чааска диэри тутабыт. Бу кытаанахтык тутуһуллар. Оттон уопсай туттарсан киирбиттэр атырдьах ыйын 3 күнүгэр диэри, эмиэ 18.00 чааска диэри аҕалан биэриэхтээхтэр. Байыаннай дьайыы кыттыылаахтара биитэр кинилэр оҕолоро военкоматтан ыспыраапка аҕалыахтаахтар.

-Оттон төлөбүрдээх үөрэххэ түбэспиттэр?

— Атырдьах ыйын 20 күнүгэр диэри төлөбүрдээх үөрэххэ ылабыт. Сороҕор бүддьүөт миэстэтигэр эбии ылыы саҕаланааччы, онно олох туспа тутар хампаанньа үлэлиир. Оннук буолара-буолбата атырдьах ыйын 9 күнүгэр эрэ биллиэ.

Төлөбүрдээх үөрэх толору төлөбүрдээххэ уонна кыччатыллыбыт төлөбүрдээххэ арахсар. Бакалавриакка, специалитекка сыллааҕы толору төлөбүр  293 тыһ. солк-тан 554 тыһ. солк-га диэри халбаҥныыр. Бу 554 тыһ. солк. “Литературнай айар үлэ” диэн идэҕэ баар. 3 миэстэҕэ уонча киһи баар буоллаҕына, ону институт факультетын салалтата бэйэтэ быһаарар.

Кыччатыллыбыт төлөбүрүнэн сыанабыт 40 бырыһыан чэпчээн, сыллааҕы төлөбүр 168 тыһ. солк. буолар. Онно БКЭ-нэн 160-тан үрдүк бааллаах оҕолор, орто анал үөрэх кэнниттэн кэлэн биһиэхэ эксээмэн туттарбыттар, бэлэмнэнии факультетын бүтэрбиттэр уонна тулаайахтар, инбэлииттэр түбэһэллэр. Маны таһынан БКЭ баала 210-тан үрдүк буоллаҕына, 156 тыһ. солк. төлүүр үөрэхтэр эмиэ бааллар.

Оттон кэтэхтэн үөрэнии төлөбүрэ сылга 80-ча тыһ. солк.

Үрдүк үөрэххэ киирбэтэхтэринэ, биһиги испитинэн баар орто анал үөрэхтэргэ киириэхтэрин сөп. Быйыл университет үрдүнэн төлөбүрэ суох үөрэх (275 миэстэ) тутуу уонна айти-идэлэри биэрэр Инфраструктурнай технология кэллиэһигэр эрэ баар.