Үөрэххэ туттарсыыга өссө биир сүрүн быраабыла

Быйыл биир кэлим эксээмэни туттарааччылар талар биридимиэккэ “былырыын бу идэҕэ маннык эксээмэннэр этэ, быйыл даҕаны онтон уларыйбата ини” эбэтэр “бииргэ үөрэнэр оҕом, кини төрөппүтэ инньэ диэтэ” диэн кимиэхэ эрэ сэлээнниир, бүк эрэнэр букатын сыыһа. Тоҕо?

Быйыл үөрэххэ туттарсыыга кэккэ уларыйыылар киирдилэр. Ол курдук, бастакытынан, үгүс инженернэй, тиэхиньиичэскэй хайысхаларга физика булгуччу ирдэнэр буолла. Бу иннинээҕи сылларга физика оннугар математика эбэтэр информатика түмүгүн билинэллэрэ. Быйыл ол суох.

Иккиһинэн, сорох хайысхаларга бу иннинэ обществознание булгуччулаах эбит буоллаҕына, быйыл туттарсар идэҕит хайысхатыгар сөп түбэһэр биридимиэт ирдэнэр буолла. Холобур, обществознание оннугар устуоруйаны ирдиэхтэрин сөп.

Эксээмэни туттаралларын уонна онно ханнык биридимиэттэри талалларын туһунан сайабылыанньаны оскуолалар, үөрэх управлениелара бүгүн – тохсунньу 30 күнүгэр уонна олунньу 2 күнүгэр эрэ ылаллар. Ол кэнниттэн ылар көҥүллэммэт. Онон быйыл оскуоланы бүтэрээччилэр, орто үөрэх кэнниттэн үрдүк үөрэххэ туттарсааччылар булгуччу үөрэнэр баҕалаах кыһаларын (университет, институт) саайтарыгар киирэн ханнык биридимиэттэр ирдэнэллэрин үөрэххэ туттарсыы быраабылатыгар көрөллөрө ордук.