«Үөрэн уонна үлэлээ»: устудьуоннар үөрэхтэрин АЛРОСА-ҕа үлэни кытары дьүөрэлииллэр

Мииринэйдээҕи политехническай институт уонна эрэгийиэннээҕи тиэхиньиичэскэй кэллиэс устудьуоннара үөрэнэ сылдьан АЛРОСА тэрилтэлэригэр үлэлиир кыахтаннылар.

2023 сыллаахха алмаастаах хампаанньа «Үөрэн уонна үлэлээ» бырагырааманы үлэлэппитэ. Билигин Мииринэй улууһун үөрэҕин тэрилтэлэрин 30-ча устудьуона үөрэҕин хаалларбакка эрэ, тэҥинэн АЛРОСА тэрилтэтигэр үлэлии сылдьар.

«Үөрэн уонна үлэлээ» бырайыагы 2022 сыллаахха АЛРОСА корпоративнай университета көҕүлээбитэ. Университет көҕүлээһинин Мииринэйдээҕи политехническай институт -– ХИФУ салаата уонна Мииринэй эрэгийиэннээҕи тиэхиньиичэскэй кэллиэһэ өйөөбүттэрэ.

Бырагыраама бастакы кыттыылаахтарыттан биирдэстэрэ, Мииринэйдээҕи политехническай инстиутут 5 кууруһун устудьуона Василий Винокуров үөрэҕин Мииринэйдээҕи-Ньурбатааҕы Хайа-байытар кэмбинээккэ силиэсэринэн үлэтин кытары дьүөрэлээбитэ икки ый буолла.

«Мин икки күн буола-буола үлэлиибин, түүҥҥү симиэнэттэн кэллэххинэ, тугу эмэ гынаргар, холобур, курсовой үлэҕин суруйаргар, биир эрэ күн хаалар. Ыарахан, ол гынан баран, преподавателларбыт биһигини өйдүүллэр. Киһи үөрэххэ ылбыт билиитин быраактыкаҕа бигэргэтэр. Үөрэхпин бүтэрэн баран, былаан быһыытынан АЛРОСА-ҕа үлэлиир санаалаахпын. Билигин бастайааннай үлэһит курдукпут», -– диир Василий Винокуров.

Бырагыраамаҕа киирсэр судургута суох. Икки сүүмэрдиир түһүмэҕи ааһыаххын наада. Аан бастаан үөрэх тэрилтэтин деканата бастыҥнары талар, ол кэнниттэн устудьуоннарга АЛРОСА-ҕа тустаах кэпсэтиини ыыталлар. «Үөрэн уонна үлэлээ» бырагыраама кыттыылаахтара үөрэнэллэригэр туспа эрэһиимҥэ көһөллөр уонна  алмаастаах хампаанньа хас эмэ тыһыынчанан ахсааннаах кэлэктиибин сорҕотунан буолаллар.

«Кинилэр хампаанньаҕа үлэҕэ ылыллаллар уонна эдэр исписэлиистэрбитинэн буолаллар. Үөрэхтэрин бүтэрдэхтэринэ эрдэ ылыллыбыт тэрилтэлэригэр салҕыы үлэлииллэр», -– диэн АЛРОСА Корпоративнай университетын профориентация хайысхатыгар уонна ыччаты кытары үлэҕэ эспиэрэ Юлия Брусенская кэпсээтэ.

Андрей Задорожнай 2022 сыллаахха Мииринэй-Ньурба кэмбинээтигэр элекстрослесарынан быраактыкаламмыта. Эдэр киһини таба көрөн, «Үөрэн уонна үлэлээ» бырагырааманан үлэҕэ киирэригэр этии киллэрбиттэрэ. Кини үлэ теорияны бөҕөргөтөргө көмөлөһөрүгэр эрэллээх.

«Мин билиҥҥитэ улахан үөрүйэҕим уонна билиим-көрүүм суоҕун иһин, куруук уопуттаах электригы кытары үлэлэтэллэр. Биһиги араас эбийиэктэргэ барабыт, онно мин кыра үлэлэри оҥорорго, сүрүн электрикпэр көмөлөһөбүн», -– диир Андрей.

Билигин бырагыраамаҕа эрэгийиэннээҕи тиэхиньиичэскэй кэллиэс 22 устудьуона кыттар. Үгүстэр дипломнарын ылан баран, АЛРОСА-ҕа үлэлиир былааннаахтар.

«Бу сөптөөх хардыы буоларын уопут көрдөрөр. Кинилэр бу бырагыраамаҕа сөп түбэһэллэр, кыайаллар. Инникитин кинилэр ахсааннара элбиэҕэ», -– диэн Мииринэй эрэгийиэннээҕи тиэхиньиичэскэй кэллиэһин дириэктэрэ Владимир Березовой эрэлин биллэрэр.

Билигин «Үөрэн уонна үлэлээ» бырагырааманан устудьуоннар Мииринэй-Ньурба, Айхал уонна Удачнай Хайа-байытар кэмбинээттэригэр силиэсэрдэринэн, электромонтердарынан уонна электрослесардарынынан үлэлииллэр.

Эһиил АЛРОСА бырагыраамаҕа өссө элбэх устудьуон киирэрин туһугар, бырайыагы кэҥэтэр былааннаах.

«Алмаастаах кыраай» МК