Үөрэнээччи сахалыы-нууччалыы тылбаастыыр боту айда

Бу күннэргэ Дьокуускайга өрөспүүбүлүкэтээҕи «Инникигэ хардыы» научнай-практическай кэмпириэнсийэ ыытылла турар. Кэмпириэнсийэ кыттааччыта, Дьокуускайдааҕы  IT-Cube иитиллээччитэ, 9-с кылаас үөрэнээччитэ Евгений Селляхов «Телеграм» социальнай ситимҥэ сахалыы-нууччалыы тылбаастыыр боту оҥорбут.

Бот диэн — робот курдук буолар, барытын бэйэтэ оҥорор. Бастаан бу ботка киирэҕин. Сахалыы, нууччалыы да, ханнык баҕарар тылы суруйдаххына, бэрт түргэнник, чыпчылыйыах түгэнэ, тылбааһын таһаарар. Онон билбэт тылы үөрэтэргэ табыгастаах буолсу.

Холобур, «кыдьымах» диэн суруйбуппар, «шуга, плавучий лед» диэн таһаарда. Ол курдук, «кырымах», «кылаан», «самаан», «сарадах», «сигэ», о.д.а. уустук тыллар хас да суолталарын, этиигэ туттуллууларын кытта быһааран биэрдэ, арай, «мадьыны», «лоһуор» диэн тыллары кыайбата. Нууччалыы тылы суруйдахха, сахалыы тылбаастыыр. Мантан көстөрүнэн, бу ботка сахалыы-нууччалыы уонна нууччалыы-сахалыы быһаарыылаах тылдьыттар киирбиттэр эбит.

Евгений «Googl-переводчик» уонна  «Yandex-переводчик» курдук аан дойду  чулуу программистарын халыҥ хамаандалара оҥорбут бырагыраамаларыгар сигэммит.

Эдэр оҕо киһи төрөөбүт тылын билэргэ дьулуһара, ону таһынан, аныгылыы сатабылын, билиитин-көрүүтүн туһанан, саастыылаахтарыгар, элбэх дьоҥҥо көмөлөһөргө санаммыта хайҕаллаах. Чахчыта, социальнай ситимнэргэ түргэн сахалыы-нууччалыы тылбаасчыт тахса илигэ.

Бу тылбаастыыр боту «Телеграм» социальнай ситимҥэ киирэн баран, TranlatorHM_bot диэн, эбэтэр, Саха Переводчик диэн суруйан баран, көрдөттөххө, булуохха сөп. Киирэн, боруобалаан көрүҥ, туһаныҥ, оҕолоргутугар көрдөрүҥ.