Үөрэнээччилэр дьиэҕэ үлэни оҥороллоругар саҥа быраабылалар киирдилэр

Арассыыйа Үөрэҕин министиэристибэтэ оскуолаҕа дьиэтээҕи үлэни толорорго биир кэлим бириэмэ нуорматын олохтоото. Бу туһунан «РИА-Новости» ааҕыныстыбаҕа үөрэх миниистирэ Сергей Кравцов иһитиннэрдэ. Саҥа быраабыла быһыытынан, бары предметтэргэ бэлэмнэниигэ муҥутуур бириэмэ күҥҥэ үс аҥаар чаастан ордуо суохтаах. Стандартары «Роспотребнадзоры» кытта бииргэ, үөрэнээччилэр сааһынан уратыларын учуоттаан, оҥордулар.

Кыра кылаастарга кытаанах хааччахтааһыннар олохтоммуттар: 1-кы кылаас үөрэнээччилэрэ дьиэҕэ үлэҕэ биир чаастан элбэҕэ суох, оттон 2-3 кылаас үөрэнээччилэригэр 1,5 чааска диэри бириэмэни ыыталларыгар сүбэлииллэр.  4-5 кылаастар үөрэнээччилэрэ 2 чааска диэри уонна 6-8 кылаастар 2,5 чааска диэри дьиэҕэ үлэлэрин толоруохтарын сөп. 9-11 кылаас үөрэнээччилэрэ күн аайы 3,5 чаас үөрэтиэхтэрин сөп.
Бу хамсааһын үөрэнээччилэри аһара ноҕуруускалыыртан босхолуурга уонна кинилэр доруобуйаларын харыстааһыҥҥа туһуланар. Саҥа быраабылалар үөрэх кыһаларын үлэлэрин биир кэлимник оҥорорго, үөрэх дьарыгын уонна сынньалаҥы дьүөрэлээн, тэҥнэһиини хааччыйарга аналлаахтар.

Бу иннинэ Үөрэх министиэристибэтэ начаалынай кылаас үөрэнээччилэригэр көҥүллэнэр үөрэх ноҕуруускатыгар саҥа ирдэбиллэри киллэрбитэ. Ол курдук, бастакы кылаас оҕолоро нэдиэлэҕэ 21 чаастан элбэҕэ суох бириэмэҕэ үөрэниэхтэрин сөп. 2-4 кылаас үөрэнээччилэрэ нэдиэлэҕэ 26 чааска диэри үөрэниэхтэрин сөп. Бастакы кылаас оҕолоругар үөрэх уопсай ноҕурууската 653 чаастан, оттон 2–4 кылаастарга — 884 чаастан тахсыа суохтаах.