Үөрэнээччилэр учууталларыгар соһуччу бэлэҕи оҥордулар

Сарсын сирдээҕи олох биир ураты сылаас тыыннаах бырааһынньыгын — Учуутал күнүн бэлиэтиибит. Билии киэҥ аартыгар Учуутал — оҕо инники кэскилин түстэһэр, олоххо бэлэмнээх ыччаты иитиһэр ытык дьоммут. Учуутал бу көннөрү идэ эрэ буолбакка, олох биэрбит анала, бэлэҕэ буолар.

Учуутал күнүн көрсө Ньурба оройуонун Н.И.Кочнев аатынан Хаҥалас орто оскуолатын 9-с кылааһын үөрэнээччилэрэ  төрөппүттэрин кытары   бииргэ Учуутал күнүгэр аналлаах хаартыска  зонатын оҥорон, сарсыарда үөрэтэ кэлбит учууталларыгар чахчыта да бырааһынньык тыынын бэлэхтээтилэр.  Учууталлар соһуйа үөрэн, хаартыска зонатыгар түһэн, уруоктарын үөрэ-көтө саҕалаатылар.

Оскуола 9-с кылааһын үөрэнээччилэрэ (кылаас сал. Васильева В.В.) алын кылаастан саҕалаан,  бары да олус иллээхтэр.  Үөрэххэ, успуорка ситиһиилээх оҕолор тахсан иһэллэриттэн киһи көрө астынар. Хаартыска зонатын  бэлэмнээри, учууталлар дьиэлэригэр тарҕаһалларын кэтэһэн, киэһэ саҕалаан, төрөппүттэрин кытта үөрэ-көтө түбүгүрбүттэрин киһи көрөн үөрэр. Бу тэрээһини төрөппүт уонна оҕо иитиитигэр биир бастыҥ холобур быһыытынан сыаналыахха сөп.

Мария НИКОЛАЕВА,

Ньурба