Үөрэнээччилэрбит Москваҕа ситиһиилэринэн киэн туттабыт

Биһиги, Сунтаар улууһун дьоно, Москваҕа туһалаах, сэргэх айаммыт уонна былааннаммыт бырайыактарбытын олоххо киллэрбиппит туһунан кэпсиэхпин баҕарабын.Сунтаар улууһун Хадан орто оскуолатын нуучча тылын учууталлара Елена Борисовна Чойнова уонна мин, Августина Николаева Попова, Москваҕа «Первые шаги в науке» Бүтүн Арассыыйатааҕы кэмпириэнсийэҕэ 4-7 кылаас 6 үөрэнээччитин кытыннардыбыт.

Түмүкпүт үчүгэй. Ол курдук, түөрт оҕо — бастакы, биир оҕо иккис миэстэ буоллулар. Анисимова Анелия ( Туойдаах оскуолата) кыайыылаах буолан, «Первые шаги в науке» бэлиэнэн наҕараадаланна. Потапов Алгыс, Иванов Кэскил «Будущее Российской науки» мэтээлинэн бэлиэтэннилэр. Бэйэм «Настаабынньык» уонна «Национальное достояние» бэлиэлэринэн наҕараадаланным.
Бу үлэлэрбитин тапталлаах өрөспүүбүлүкэбит 100 сылыгар анаабыппыт, кыттааччыларга Сахабыт сирин култууратын билиһиннэрэр сыаллаах-соруктаах этибит. «Старинные игры и игрушки народа Саха», «Сэргэ как культурная и духовная ценность народа Саха», «Бродячий сюжет как основа литературных сказок «Госпожа Метелица, Морозко», «Влияние характера на поступки в условиях выживания по рассказам В. Распутина и Н. Габышева» диэн тиэмэлэри талбыппыт.
Маны таһынан, Дьаархан нэһилиэгин төрөппүттэрин көмөтүнэн Москваҕа госпиталга сытар буойуннарга кэһии уонна оҕолор суруктарын Саха сирин бастайааннай бэрэстэбиитэлистибэтигэр аҕалан туттардыбыт. Манна улахан көмөнү Надежда Петровна Винокурова уонна волонтер, бэйэтэ байыаннай эбээһинэстээх Айыына Храмова оҥордулар.
Өссө биир кэрэхсэнэр түгэнинэн Щепкин аатынан тыйаатыр училищеҕа саха устуудьуйатын дипломнай испэктээгэр ыҥырыылаах ыалдьыт буолан сырыттыбыт. «Шоколадный солдатик» романтическай кэмиэдьийэ ааптара — Б. Шоу.
Оонньуу аналлаах аудиторияҕа, 40-50 көрөөччү киирэр саалатыгар буолар эбит. Саала иһэ тобус толору, артыыстар биир дойдулаахтара, чугас дьонноро кэлбиттэр. 7 чаастан саҕаламмыт испэктээк биир тыынынан барда, сороҕор күлэн, ардыгар сонньуйан, олох, сэрии, таптал туһунан айымньыны сэргии көрдүбүт. Бу кэмиэдьийэҕэ икки сүрүн оруолу Иван Кузьмин, Аида Еремеева чаҕылхайдык, сэргэхтик толордулар. Дьаархантан төрүттээх, «Одунтан» кынаттаммыт артыыстарбытын аҕыйах кэминэн Сахабыт сирин тыйаатырдарыгар көрүөхпүт турдаҕа.

Августина ПОПОВА