Үөрэнээччилэргэ аналлаах норуоттар икки ардыларынааҕы тэрээһиннэр ыытыллыахтара

Быйыл от ыйыгар Саха сиригэр үөрэнээччилэргэ аналлаах норуоттар икки ардыларынааҕы таһымнаах тэрээһиннэр ыытыллыахтара. Ити туһунан бүгүҥҥү пресс-кэмпириэнсийэҕэ тэрийээччилэр иһитиннэрдилэр.

От ыйын 2-10 күннэригэр Дьокуускай куоракка 32-с төгүлүн “Туймаада” норуоттар икки ардыларынааҕы үөрэнээччилэр олимпиадалара буолуоҕа. Билим Дьоҕус академиятын ректора Василий Павлов иһитиннэрбитинэн Арассыыйа 11 уобалаһыттан, өрөспүүбүлүкэтиттэн, куоратыттан уонна түөрт тас дойдуттан (Индонезия, Румыния, Казахстан, Монголия) барыта 70 оҕо кыттыаҕа. Саха сирэ, үгэс быһыытынан, икки хамаанданы туруоруоҕа.

Икки күн устата оҕолор математикаҕа, физикаҕа, химияҕа, информатикаҕа биэстии чаас садаача суоттуохтара. Сорудахтар эспиэр-ааптардарынан Арассыыйаҕа киэҥник биллэр Бүтүн Арассыыйатааҕы, норуоттар икки ардыларынааҕы таһымнаах олимпиадалар мэтэдиичэскэй хамыыһыйаларын дьүүллүүр сүбэтэ, бэрэпиэссэрдэр, преподавателлэр, учууталар, аспирааннар буолаллар.

Кыттааччыларга анаан экскурсиялары, култуура-сырдатар бырагыраамаларын тэрийиэхтэрэ. Итини тэҥэ, дэлэгээссийэлэр салайааччылара, педагогтар, уһуйааччылар кыттыылаах айдарыылаах оҕолору кытта үлэлээһии уопутун атастаһыыга вебинар ыытыахтара.

Иккис улахан тэрээһининэн от ыйын 6-9 күннэригэр Билим Дьоҕус академиятын баазатыгар  ыытыллар үөрэнээччилэр норуоттар икки ардыларынааҕы билим кэмпириэнсийэ-куонкурустара буолар. Манна 11 дойдуттан, ону тэҥэ, Арассыыйаттан барыта 270 оҕо кыттыаҕа. Саха сирин аатыттан Дьокуускай куорат, Сунтаар, Чурапчы, Нам, Ньурба, Горнай, Бүлүү улуустарын оҕолоро кыттыахтара. “Бу олус интэриэһинэй тэрээһин. Норуоттар икки ардыларынааҕы билимҥэ хардарыта санаа атастаһыытыгар, сибээһи олохтооһуҥҥа эйгэ тэриллэр. Чинчийэр үлэ түмүгүн билиһиннэрии аангылыйа тылынан барар. Математика, көмпүүтэр билимэ, информационнай технологиялар, физика, астрономия, инженернэй билим, олох туһунан билим, тулалыыр эйгэ, химия билимэ, социальнай-гуманитарнай билим сиэксийэлэрэ баар буолуохтара. Күөн күрэс икки түһүмэхтэн туруоҕа. Кыттааччылар маҥнай дакылаат быһыытынан эспиэртэр иннилэригэр кэпсиэхтэрэ, онтон постернай сиэссийэ тэриллиэҕэ” – диэн Билим Дьоҕус академиятын ректора Василий Павлов иһитиннэрдэ.

Хотугулуу-Илиҥҥи федеральнай университет үөрэх-мэтиэдикэ үлэтигэр проректора Алексей Голиков: “Университекка анал-үөрэтэр киин үлэлиир. Тустаах киин үөрэнээччилэрэ кэмпириэнсийэҕэ сылын ахсын кытталлар. Былырыын уон үөрэнээччи кыттыбытыттан биир оҕо бастаабыта, тоҕус оҕо миэстэлэспитэ. Быйыл сэттэ үөрэнээччи кыттыаҕа” – диэн эттэ. Оҕолор тус ситиһиилэрэ Хотугулуу-Илиҥҥи федеральнай университекка үөрэххэ киирэллэригэр учуоттанарын, кыайыылаахха 7 баал, миэстэлэспиккэ 5 баал, кыттааччыга 1 баал эбиллэрин иһитиннэрдэ.

Олимпиаданы, кэмпириэнсийэни Үөрэх уонна билим министиэристибэтэ, М.К.Аммосов аатынан Хотугулуу-Илиҥҥи федеральнай университет, Билим Дьоҕус академията тэрийэн ыыталлар.