Үөрэнээччилэргэ хабыр сыһыанын иһин педагог холуобунай дьыалаҕа тардылынна

ИДьМ Уус Алдан улууһунааҕы салаатын дознавателэ РФ Холуобунай Кодекс “Педагогическай үлэһит сокуоннай саастарын туола илик оҕолору иитиигэ сөбө суох хабыр сыһыаннаах быһыыны оҥоруута” 156-с ыстатыйатынан 29 саастаах физкултуура учууталыгар холуобунай дьыала тэрилиннэ.  

Холуобунай дьыала сокуоннай саастарын туола иликтэр дьыалаларын салаатын үлэһиттэрин бэрэбиэркэлээбит матырыйаалларынан  тэрилиннэ. Үлэһиттэр педагог өттүттэн 14-15 саастаах сокуоннай саастарын туола илик түөрт уолга мэлдьи хабыр сыһыаннаһыы (жестокое обращение) бэлиэтэ баарын быһаарбыттар. Ити туһунан ИДьМ пресс-сулууспата иһитиннэрэр.

Педагог үөрэнээччилэргэ сөбө суох быһыыны  туттар, холобур, эриллибит кытаанах тэтэрээтинэн, быласымаас турбанан, ону тэҥэ, сутуругунан охсор эбит.