Үөрэтэр кииннэргэ 415 сылгыһыт уонна исписэлиис үөрэммит

Саха сиригэр сылгыны үөрдээн иитиини аадырыстаах өйөөһүн көдьүүстээх ньыматынан саҥа саҕалыыр уонна дьиэ кэргэн пиэрмэрдэрин гранынан өйөөһүн буолла.

СӨ Тыатын хаһаайыстыбатын уонна аска-үөлгэ бэлиитикэтин миниистирэ Артем Александров  соторутааҕыта ыытыллыбыт сылгы иитиитигэр анаммыт билим-кэмпириэнсийэҕэ эппитинэн, 2012-2023 сылларга 1 тыһыынчаттан тахса грант бэриллибит, итинтэн 293 – сылгы хаһаайыстыбатын тэрийиигэ уонна сайыннарыыга.

2018 сылтан саҕалаан эдэр сылгыһыттары уонна исписэлиистэри үөрэтэр туһуттан өрөспүүбүлүкэ 3 племенной хаһаайыстыбатыгар үс Үөрэтэр киин тутуллубута. Бу сылларга Хаҥалас, Өймөкөөн, Ньурба улуустарыгар тутуллубут базаларга 415 киһи үөрэннэ.

Хаартыска: Станислав Андреев хаартыската.