Үгүлээккэ ытык саастаах дьон дьиэлэрин өрөмүөннүүллэр

Бүлүү улууһун Үгүлээт дьаһалтата сылын аайы нэһилиэк кырдьаҕастарыгар дьиэлэрин өрөмүөннүүр. Тутуу матырыйаалын атыылаһан, босхо аҕалтарар. 

Быйыл күһүн нэһилиэк олохтоохторо РФ норуотун үөрэҕириитин туйгуна, педагогическай үлэ бэтэрээнэ, сэрии сылын оҕото, ытык кырдьаҕас Семен Пудович Чабыев (кэргэнэ Александра Матвеевна) дьиэтин муостатын  саҥардан өрөмүөнү саҕалаатылар.  Үгүлээт хоһуун  эр дьоно мустан   муостаны түргэнник көтүрэ охсон, хапытаалкатын көтөхтөрөн көннөрдүлэр. Бүгүн кумах куталлар, саҥа сындыыстары түһэрэллэр уонна муоста маһын саайаллар. Өрөмүөн сарсын бүтүөн наада. Оччоҕуна өйүүҥҥэттэн дьиэни сууйан-сотон баран, кырааскаланыахтаах. Субуотунньукка сылдьар дьону элбэх ынахтаах Елена Ивановна, Иван Прокопьевич Афанасьевтар  минньигэс быырпаҕынан күндүлээтилэр.

Елена Мандарова.