Үгүс улуустарга хаһаайыннаах ыттар көҥүл-босхо сылдьаллар

Бэйдиэ сылдьар ыт кыһалҕатыттан сылтаан СӨ Бэтэринээрийэ департаменын иниспиэктэрдэрэ кыттыылаах үгүс рейдэлэр  ыытыллаллар.

Ол рейдэлэр ахсын уонтан кырата суох ыстараап боротокуола толоруллар. Бу ааспыт нэдиэлэҕэ маннык рейдэлэр Амма, Таатта, Томпо, Уус Алдан, Бүлүү улуустарыгар уонна Дьокуускай куоракка ыытылыннылар.  Ол курдук нэдиэлэ иһигэр 16 боротокуол толоруллубут, ону таһынан СӨ уонна РФ административнай быраабы кэһии кодексатын  5.4 уонна 8.52 ыстатыйаларынан ыттаах хаһаайыттары 16 тыһыынча солкуобайга ыстарааптаатылар, ыттаах түөрт хаһаайыҥҥа сэрэтии киирдэ. Ыттаах хаһаайыттары эппиэтинэскэ тардыы сүрүн биричиинэтэ — ыттары  көҥүл ыытыы буолар. Ол эрээри билигин даҕаны үгүс улууска хаһаайыннаах ыттар көҥүл-босхо сылдьаллар.  Оскуола, уһуйаан таһыгар үөрүнэн мустан дьону сүгүн хаамтарбаттар.  Олохтоох дьаһалта сөптөөх миэрэни ылбатыттан дьон-сэргэ эмсэҕэлиэн сөп.