Ыһыах күн  Дьокуускайга ойуур бибилэтиэкэтин арыйдылар

Ыһыах күн, бэс ыйын 21 күнүгэр, киин куоракка «Библиопарк» ойуур бибилэтиэкэтин саҥа түһүмэҕэ арылынна. Бу бэлиэ түгэҥҥэ Дьокуускай куорат думатын бэрэссэдээтэлин солбуйааччы Евдокия Евсикова, куорат дьаһалтатын култуураҕа уонна духуобунай сайдыыга управлениетын салайааччытын солбуйааччы Юлия Лазарева уонна киин библиотека ситимин дириэктэрэ Ньургуйаана Решетникова кытыннылар.

Ойуур бибилэтиэкэтин арыллыытын кытыылаахтарын тэрийээччилэр сахалыы таҥастаах уонна алгыс тыллаах көрүстүлэр. Ыалдьыттарга алаадьылаах уонна баахылалаах сандалы тардылынна. Оттон кырачаан ааҕааччылар сахалыы остуол оонньуутугар холонон көрдүлэр. Онон тэрээһин саха ыһыаҕын сиэрин-туомун туһунан ыытылынна.

«Биһиги куораппыт аҕыйах сыллааҕыта Арассыыйа бастыҥ ааҕар куоратын үрдүк аатын ылбыта. Ол үгэс күн бүгүҥҥэ диэри тутуһулларын маннык бырайыактар быһаччы кэрэһилииллэр. Мин “Библиопарк” Култуура уонна сынньалаҥ пааркатыгар сылдьар куорат олохтоохторугар уонна ыалдьыттарыгар сөбүлүүр сиринэн буолуо диэн эрэнэбин», – диэн тылларынан ойуур библиотекатын быйылгы түһүмэҕин арыйда Евдокия Евсикова.

Ойуур бибилэтиэкэтин үлэһиттэрэ этэллэринэн, бу бырайыак сүрүн уратыта куорат ааҕааччылара сынньалаҥнарын көдьүүстээхтик атааралларыгар кыах биэрэр – бэс чагда чэбдик салгыныгар кинигэ тутан баран күүлэйдиэххэ, бүччүм сири булан сөрүүҥҥэ ааҕыахха сөп.

«“Библиопарк” куорат олохтоохторун таптыыр сирдэригэр кубулуйан эрэр. Ойуур бибилэтиэкэтигэр кэлэн кинигэ, ускуустуба уонна оҕо саас эйгэтигэр өтөн киирэҕин. Сыл сылтан ааҕааччы үксээн уонна өссө кэҥээн, сайдан иһиэ дии саныыбын», – диэн баҕа санаатын эттэ Юлия Лазарева.

Тэрийээччилэр бэлиэтииллэринэн, оҕолор ойуур бибилэтиэкэтигэр сылдьан билиилэрин-көрүүлэрин хаҥатар, сайдар кыахтаналлар. Ол курдук, маҥнайгы кырачаан ыалдьыттарга ойуур бибилэтиэкэтин таабырын уонна оонньуу ньыматынан билиһиннэрдилэр. Оҕолор бу тэрээһинтэн кинигэлиин доҕордоһуу уонна кинигэҕэ харыстабыллаах сыһыан үтүө үөрүйэхтэригэр үөрэннилэр.

«Биһиги саха төрүт бырааһынньыга – Ыһыах күн ойуур бибилэтиэкэтин саҥа түһүмэҕин саҕалыырбытыттан киэн туттабыт. Ойуур бибилэтиэкэтэ диэн бырайыак аан бастаан 1942 сыллаахха саҕаламмыта. Билигин биһиги саҥардыллыбыт ойуур библиотекатын куорат олохтоохторугар билиһиннэрэбит. Бу тэрээһин олоххо киирбитин иһин “Народный бюджет” бырайыакка махталбытын биллэрэбит. Быйыл кырааскалаан тупсаран биэрдибит, саҥа миэбэл уонна тиэхиникэ туруордубут. Онон “Народный бюджет” бырайыак көмөтүнэн куораппыт олохтоохторо уонна тапталлаах ааҕааччыларбыт сайыны көдьүүстээхтик атаарарга өссө биир бэртээхэй түһүлгэлэннилэр», – диэн билиһиннэрдэ Ньургуйаана Решетникова.

Дьоро күн оһуохайынан түмүктэннэ. Ойуур бибилэтиэкэтин арыйар чаҕылхай тэрээһин ааҕааччылар кэккэлэрин хаҥаппыта, дьон-сэргэ болҕомтотун тардыбыта чахчы. Дьокуускай куорат киин бибилэтиэкэтин ситимэ куорат олохтоохторун уонна ыалдьыттарын Култуура уонна сынньалаҥ пааркатыгар үлэлиир тупсарыллыбыт «Библиопарк» бырайыагы тумнан ааспаттарыгар ыҥырар.

Дьокуускайдааҕы киин бибилэтиэкэ ситимэ