“Үһүс көлүөнэ оскуолатыгар” дьарыктанабыт

Өрөспүүбүлүкэбитигэр «Үһүс көлүөнэ оскуолата» тэриллэн үлэлээбитэ балай да кэм ааста. Аҕам саастаах дьон, дьиэҕэ хаайтаран олорбокко, араас дьарыктарга сылдьан, бэйэлэрин сайыннараллар. Дьоҕурдаах өттүлэрэ атыттары үөрэтэллэр, маастар-кылаастары ыыталлар.

Мин биир бэйэм аан дойдуну сабардаабыт хамсык ыарыы кэнниттэн быраас сүбэтинэн аан бастаан ырыанан дьарыкка сылдьыбытым. Онно дьарыктаныым миэхэ тыҥабын бөҕөргөппүтэ уонна истириэстэн тахсарбар көмөлөспүтэ дии саныыбын. Билигин хоһоон куттаахтар куруһуоктарыгар “Сайдамҥа” (салайааччы М. Г. Габышева) уонна уруһуйга (сал. А. Е. Шахурдина) сылдьабын.

Литкуруһуокка биһиги суруйааччылары кытта көрсүһэбит, кинигэни сүрэхтиибит, ким туохха дьоҕурдааҕынан маастар-кылаастары, “Брейн-ринг” өй оонньуутун ыытабыт, биэчэрдэри тэрийэбит, кэнсиэр көрдөрөбүт.

“Живопись” куруһуогар араас ньыманан уруһуйдуурга үөрэнэбит. Ол курдук акварелынан, гуаһынан, пастелынан, маслонан туттарга үөрэннибит. Учууталбыт Александра Еремеевна Шахурдина — сэрии кэмин оҕото. Худуоһунньук үөрэхтээх буолан, уруһуй кистэлэҥнэрин бэрт кыһамньылаахтык үөрэтэр. Бу дьарыктаммыт кэммит устата айылҕаны, кыылы-сүөлү, көтөрү уруһуйдуурга, өссө натюрморт оҥорорго үөрэннибит.

Куруһуокпут ыстаарысталара Маргарита Гаврильевна Габышева, Нина Ивановна Михайлова салайар-тэрийэр дьоҕурдаах дьон.

Түмүкпэр этиэм этэ: аҕам саастаах дьон, түөрт муннукка хаайтаран олорбокко, “Үһүс көлүөнэ оскуолатыгар” кэлиҥ, сылдьыҥ, үүнүҥ-сайдыҥ, талааҥҥытын аҕыс кырыытынан күлүмнэтэ оонньооҥ!

Елена Прокопьева,

уопсастыбаннай кэрэспэдьиэн.